Ғалымдар қарғалардың шешімді адамнан екі есе жылдам қабылдайтынын анықтады

Тюбинген университетінің биологтары дәлелдегендей, қара қарғалар адамдар мен приматтарға қарағанда визуалдық таңдауды дәлдігін жоғалтпастан екі есе жылдам жасай алады, деп жазды SciTechDaily-ге сілтеме жасаған KAZ.NUR.KZ.

Тәжірибе барысында ғалымдар құстарға сенсорлық экраннан қозғалатын ақ нүктелер жиынтығын көрсетті. Қарғалар нысандардың көпшілігі қай бағытқа (солға немесе оңға) жылжып жатқанын анықтап, монитордағы тиісті нысананы шоқуға тиіс болды.

Қанаттылардың шешім қабылдауына орта есеппен 235 миллисекунд, яғни ширек секундтан аз уақыт кетті. Нүктелердің бағыты анық болған кезде құстар 100 пайыз дұрыс жауапты көрсетті. Тіпті ретсіз қозғалысы бар күрделі тесттердің өзінде олардың нәтижелері кездейсоқ болжамнан жоғары болып қалды.

Зерттеу авторлары құстар миының нидопаллиум деп аталатын құрылымындағы жеке нейрондардың белсенділігін зерттеді. Бұл бөлім сүтқоректілердің префронтальдық қыртысына ұқсас функцияларды атқарады және ақпаратты өңдеу мен әрекетті таңдауға жауап береді. Жазбалар қарға миының сурет пайда болғаннан кейін небәрі 70 миллисекунд өткен соң қозғалыс бағытын ажырата бастайтынын көрсетті.

Құстарда адам немесе маймылдар сияқты қабатты үлкен жарты шарлар қыртысы жоқ, алайда олардың миындағы шешім қабылдаудың базалық принциптері ұқсас болып шықты.

Зерттеушілер өте жылдам реакцияны жабайы табиғаттағы өмір ерекшеліктерімен байланыстырып отыр. Құстар жоғары жылдамдықта ұшу кезінде маневр жасау барысында жағдайды лезде бағалап, қорек іздеу кезінде тұмсықты дәл бағыттай алады. Дәл осындай жылдам деректерді өңдеудің механизмдерін ғалымдар әлі анықтауы керек.

Мәтіннен қате тапсаңыз, бізге жазыңыз