Жусай қосылған күлше нан: Гүлжанат Нұрышева әзірбайжан тағамының рецебін ұсынды

Жусай қосылған күлше нанды әзірбайжан халқы - кутабы деп жатады. Дәмі ерекше тағамды қалай әзірлеуге болады? Гүлжанат Нұрышеваның рецебінен біле аласыздар.

Кутабы - әзірбайжан халқының ұлттық тағамдарының бірі. Оның жасалу жолымен белгілі фудблогер Гүлжанат Нұрышева таныстыратын болады. Блогердің YouTube арнасынан одан бөлек басқа да тағамдардың рецебімен таныс бола аласыздар.

Сипаттамасы

Асхана: Әзірбайжан

Санаты: тіскебасар

Дайындалу уақыты: 30 минут

Дайын болу уақыты: 5 минут

Құрамы

Аскөк - 100 г

Ұн - 300 г

Өсімдіа майы - 1.5 ас қасық

Жасыл пияз - 50 г

Тұз - 1 шай қасық

Су. - 150 мл

82,5% cары май - 50 г

Жусай - көлеміне қарай

Дайындалуы

1. Қамыр илейміз

Суды қайнатамыз. Қайнаған суды миксердің ыдысына саламыз. Сосын бір шай қасық тұз бен өсімдік майын саламыз. Ұнды електен өткізіп, миксердің ыдысына салып, қамыр илейміз. Дайын болған қамырды 15-20 минутқа тындырып қоямыз.

2. Пияз бен жусайды тураймыз

Жусай, аскөк және жасыл пиязды тураймыз. Егер шпинатты ұнатсаңыз, кутубаның салмасына шпинатты қолдансаңыз да болады.

3. Қамырды жаямыз

Тынып тұрған қамырды алдымен бірнеше бөліктерге бөлеміз. Сосын әр бөлікті жұқа етіп, дөңгелек пішінде жаямыз.

4. Күлшелерге салмасын саламыз

Жайылған дөңгелек пішіндегі қамырға салмасын саламыз. Салмасына дәміне қарай тұз бен ерітілген сары майды салуды ұмытпаңыз. Сонда салма сөлін бөліп, дәмді болып шығады.

5. Күлшелерді пісіреміз

Кутабы күлшелерін қызып тұрған табаға салып, әр жағын 3-4 минут табада ұстап, екі жақ беті қызарғанша пісіріп аламыз. Піскен кутабы күлшелерін тәрелкеге салып, бетіне сары май жағамыз. Осылайша, дастарханға ұсынамыз.