Қазақ дизайнерінің сән туындылары Парижде көрсетілді (видео)

Қазақтың жас дизайнер қызы Әйгерім Алтынбаева сән туындаларын алғаш рет Парижде көрсетті. Іс-шара ғаламдық сән әлемінің көрнекті орны Ритц тарихи қонақ үйінде өтті, деп хабарлайды 24KZ.

Телеарнаның хабарлауынша, Әйгерім Лондондағы Ковентри университетін "Киім дизайнері" мамандығы бойынша бітірген. Оның дипломдық жұмысы Сингапурдегі халықаралық сайыста бірінші орынды жеңіп алған.

Әйгерім Алтынбаеваны Францияға Париж сән апталығы аясында шақырған. Көрсетілімге келгендер қазақ қызының шығармашылығын жоғары бағалап жатыр.

"Маған коллекция өте қатты ұнады. Өйткені одан нәзік сезім, бекзаттық, бибілерге тән биязылық байқалады. Дизайнер тарихи фильмдерді көп көрген секілді. Орта ғасырдың өр рухын сезінесің. Қосетекті, алтын нақышты киімдері көп", - дейді модель Мелисса Дукуре.