Top.Mail.Ru

Сайт нұсқасы

ru kz

Зектілері

Елімізде баспана бағасын төмендету үшін шұғыл шаралар қабылданады

Опубликовано:

Баспана
Көрнекі сурет: pixabay.com

Премьер-министр Асқар Маминнің төрағалығымен өткен үкімет отырысында тұрғын үй құрылысы нарығындағы жағдай қаралды деп хабарлайды Sputnik Қазақстан.

Ұлттық статистика бюросының мәліметінше, 2021 жылдың қаңтар-мамырында жаңа үйлердің бағасы 8 пайызға, ал қолданыстағы баспана 13 пайызға өскен.

Қаңтар-сәуірде отандық құрылыс материалдары 16 пайызға қымбаттаған.

Бәсекелестікті қорғау және дамыту агенттігінің төрағасы Серік Жұманғарин үкімет отырысында тұрғын үй құрылысы нарығында бірқатар фактор мен кедергілер бағаның өсуіне әсер еткенін жеткізді.

Оның сөзінше, баға жағдайына нарық қатысушыларының алыпсатарлығы да әсер еткен. Бүгінгі таңда Бірыңғай жинақтаушы зейнетақы қорының деректері бойынша баспана жағдайын жақсартуға 1,4 триллион теңге бағытталған, бұл қолжетімді зейнетақы қаражатының жалпы көлемінің 60%-ін құрайды, дейді Серік Жұманғарин.

Осылайша тұрғын үй бағасының өсуіне тек құрылыс материалдарының қымбаттауы ғана емес, сонымен қатар жоғары сұраныс та ықпал еткен.

Оның айтуынша, мемлекет басшысының тұрғын үй бағасының өсуіне жол бермеу туралы тапсырмасын орындау аясында 14 құрылыс компаниясына бағаны түсіру жайлы хабарлама жіберілген.

Шымкент, Қарағанды, Өскемен және Қостанай қалаларында құрылысышылар осы тапсырманы орындап, бағаны орта есеппен 15-20 пайызға төмендеткен.

Бірақ монополияға қарсы органның ақпарат талап ету жөніндегі заңды іс-қимылдарына барынша қарсылық көрсеткен ірі құрылыс ұйымдары да болған.

"Бұл – BAZIS-А, Bi Group, RAMS Qazaqstan. Олар бас тартты және толық емес ақпарат берді. Сондай-ақ соттағы әрекеттерімізге шағым жасады. Ақпаратты ұсынбағаны үшін әкімшілік жауапкершілік туралы 21 хаттама жасалды, ал соттар салған айыппұлдардың жалпы сомасы 9,6 миллион теңгеден асты", - деді Серік Жұманғарин.

Премьер министр Асқар Мамин  бағаның негізсіз өсуіне жол бермеу және нарықта қатаң бақылауды қамтамасыз ету бойынша шұғыл шаралар қабылдау өте маңызды екенін алға тартты. 

"Құрылыс компаниялары мен отандық құрылыс материалдарын өндірушілер тарапынан спекулятивтік әрекеттерге жол бермеу қажет. Бәсекелестікті қорғау агенттігі индустрия министрлігімен және әкімдіктермен бірлесіп,  жауапсыз өндірушілер мен өнім берушілерге қатысты қатаң шаралар қабылдауға тиіс", - деді үкімет басшысы.

Сонымен қатар Асқар Мамин офтейк-келісімшарттар да баға тұрақтылығын қамтамасыз етудің тиімді құралы бола алатынын жеткізді. Айтуынша, қазір  үкімет құрылыс компанияларымен баспананы белгіленген бағамен сатып алуға оффтейк-келісімшарттар тетігін енгізіп жатыр. 

Бұған қоса индустрия министрлігіне кәсіпкерлер палатасымен бірлесіп, құрылыс компаниялары мен құрылыс материалдарын өндірушілер арасында ұзақмерзімді сатып алу келісімшарттарын жасау мүмкіндігін пысықтау тапсырылды.

Сонымен қатар құрылыс саласында импортты алмастыру жобалары да жүзеге асырылуы керек, деп сөзін қорытындылады үкімет басшысы.

Мақаланың түпнұсқасы: https://kaz.nur.kz/nurfin/1917067-elimizde-baspana-bagasyn-tomendetu-usin-sugyl-saralar-qabyldanady/

pixel