Қазақстанда жеңілдетілген автонесие рәсімдеуге болатын онлайн платформа қашан іске қосылады

Өнеркәсіпті дамыту қоры басқарма төрағасының орынбасары Ринат Ғаппаров баспасөз мәслихатында елде жеңілдетілген автонесие рәсімдеуге болатын онлайн платформаның қашан іске қосылатынын айтты, деп хабарлайды KAZ.NUR.KZ тілшісі.

Ринат Ғаппаров жеңілдетілген автонесие бағдарламасы іске қосылғаннан кейін көлікті де, несиені де алу жүйесінің ашық еместігі туралы сынның көп болғанын мойындады. Сондай-ақ ол алаяқтардың пайда болғанын, ақша үшін кезекті жылдамдатуды, көлікті алу үшін келіссөз жүргізуді ұсынған түрлі делдалдардың пайда болғанын айтты.

"Біз жеңілдетілген автонесие бағдарламасына қатысу механизмін өзгерту туралы шешім қабылдадық және Бірінші кредиттік бюромен бірлесіп жеңілдетілген автонесие алуға өтінімдерді қабылдау платформасын әзірледік. Платформаның басты мақсаты - бағдарламаға қатысуға тең құқықты қамтамасыз ету және осы бағдарламаға қатысуды ашық ету", - дейді спикер.

Ол бұл платформаның өтініш берушілер пулы түрінде болатынын атап өтті. Платформа болашақта кезекті жояды деген болжам бар.

"Көлік пен автокөлікті несиеге алу үшін бір мезгілде автосалондар мен банктерге бірдей бара алатын өтініш берушілер пулы болады. Бағдарлама пилоттық режимде дүйсенбі күні, 6 ақпанда Астана уақыты бойынша сағат 10:00-де іске қосылады деп жоспарлануда.

Өтініш берушілерге интернетке қосылған компьютер, жеке тұлғаның ЭЦҚ кілті болуы шарт және NCAlayer бағдарламалық құралын орнату қажет. Бұл платформаға Қазақстан аумағынан ғана тіркелуге болады", - деді Ринат Ғаппаров.

Оның айтуынша, 761 қатысушы тіркелгеннен кейін өтінім түймесі өз жұмысын тоқтатып, өтінімдерді қабылдау уақытша тоқтатылады.

"6 ақпаннан бастап автокөлік пен несие алудың барлық рәсімі 60 күнтізбелік күн ішінде аяқталуы керек. Бұл процедураны аяқтауға уақыты жоқ барлық өтініш беруші пулдан шығарылады және олар келесі жолы өтініш бере алады (жеңілдетілген автонесие рәсімдеудің келесі айналымында – ред.).

Қазіргі уақытта несие төлемдері арқылы 7,6 млрд теңге жиналды, бұл 6 ақпанда 761 адам қатыса алады деген сөз. Болашақта біз платформаны ай сайын ашуды жоспарлап отырмыз, онда 100-ден астам қатысушының өтініші қабылданады деп жоспарлануда", - деп түйіндеді сөзін спикер.

Кейінірек, Ринат Ғаппаров бағдарламаның негізгі шарттарына сай, бір адам екі жылда бір рет қана несие ала алатынын айтты.

"Бұл бағдарлама бойынша алты көлік алу мүмкін емес. Платформа ондайды жібермейді. Бұған дейін де мұндай жағдайлар болған емес. Егер сіз көлік алсаңыз, келесісін алу үшін екі жыл күтуіңіз керек", - деп сендірді ол.

Еске сала кетейік, жеңілдетілген автонесие бағдарламасы 2022 жылдың мамырында іске қосылған еді. Оған сәйкес, қазақстандықтар отандық көлікті сатып алу үшін 4 пайызбен несие ала алады. Кейін банктер бағдарламаны бірнеше рет тоқтатты, оның себебін бөлінген қаражатты толық игерілгенімен түсіндірген.