"Жастарға арналған тұрғын үй": 27 наурызда еліміздің тағы бір облысында құжат қабылдау басталады

Ұлытау облысының жастарына арналған "Ұлытау жастары" тұрғын үй бағдарламасына өтінімдер 27-31 наурыз аралығында қабылданады, деп хабарлайды Ұлытау облысы әкімдігінің ресми сайтында.

Әкімдіктің мәліметінше, бағдарлама аясында жастарды тұрғын үймен қамтамасыз етуге 750 млн теңге көлемінде қаражат жұмсалады.

Бағдарлама шарттары мынадай:

жылдық несие мөлшерлемесі - 6%;

қарыздың ең жоғары сомасы - 20 млн теңге;

бастапқы жарна - кем дегенде 10%.

Жеңілдетілген тұрғын үй несиесін беру кезінде некенің ұзақтығы, бала саны, жұмыс өтілі және тағы басқа көрсеткіштер қаралады.

"Ұлытау жастары" бағдарламасына мынадай сала мамандары қатыса алады:

• денсаулық сақтау саласындағы мемлекеттік ұйымдардың қызметкерлері;
• білім беру саласындағы мемлекеттік ұйымдардың қызметкерлері;
• мемлекеттік мәдени ұйымдардың қызметкерлері;
• мемлекеттік ұйымдарда еңбек қызметін жүзеге асыратын спортшылар мен жаттықтырушы-оқытушылар;
• бұқаралық ақпарат құралдарының қызметкерлері;
• жоғары оқу орындарының штаттық қызметкерлері;
• халықты әлеуметтік қорғау саласындағы мемлекеттік ұйымдардың қызметкерлері.

Оларға қойылатын талап бойынша қатысушының жасы өтініш берген кезде 35 жастан (қоса алғанда) аспауға тиіс. Сондай-ақ үміткердің және оның отбасы мүшелерінің Қазақстан аумағы бойынша соңғы 5 жылда меншік құқығындағы тұрғын үй болмауы керек.

"Таңдалған салада кемінде соңғы 1 жылда ресми жұмыс өтілі болуы керек және зейнетақы жарналары міндетті түрде төленуі қажет. Бағдарламаға ерлі-зайыптылардың біреуі ғана қатыса алады. Өтінімдер 2023 жылдың 27-31 наурызы аралығында сағат 09:00–18:00 аралығында қабылданады" - делінген әкімдік хабарламасында.