Қазақстанның қай қалаларында пәтер ең төмен бағамен сатылады

Қазақстанның қайталама жылжымайтын мүлік нарығында бағаның төмендеуі тіркелді. Қай қалада пәтерлердің құны ең арзан. Бұл туралы "Крыша" порталына сілтеме жасаған KAZ.NUR.KZ хабарлайды.

Шілде айында тұрғын үй нарығында сарапшылар бағаның төмендеуін тіркеді. Бұл жағдай жаңа тұрғын үйге де, қайталама тұрғын үйге де әсер етті. Нарықтағы баға бастапқы тұрғын үй үшін ел бойынша орташа есеппен 0,1%-ға, ал қайталама тұрғын үй үшін бір айда 1,7%-ға төмендеді.

Белгілі болғандай, бұл үрдіс тамыз айында да жалғасты. Пәтерлерді сату туралы хабарландыруларды сараптай келе, сарапшылар соңғы айда "қайталама тұрғын үй" орташа есеппен 1%-ға төмендегенін анықтады. Жүргізілген мониторинг қорытындысы бойынша, 17 қаланың 12-сінде баға төмендеді.

Бұл ретте Павлодар, Астана, Алматы, Өскемен және Тараз қалаларын қоспағанда - өзге қалаларда бір айдағы бағалар, керісінше, 1%-ға өсті.

Бағаның ең көп төмендеуі Ақтау мен Ақтөбеде тіркелді - әрқайсысында 1,7%. Одан кейінгі сатыда Петропавл мен Қарағанды, онда қайталама тұрғын үй тиісінше 1,5%-ға және 1,3%-ға арзандады.

Айта кетейік, жалпы алғанда тұрғын үй бағасы 2023 жылдың басындағы көрсеткіштен орташа есеппен 1,2%-ға арзандады. Алматы мен Ақтау қалаларында тұрғын үй керісінше 0,7% және 6,1%-ға қымбаттады.

Қазақстанда тұрғын үй қанша тұрады

Еліміздегі ең қымбат қайталама тұрғын үй Алматыда сатылады – 1 шаршы метрге шамамен 703 мың теңге. Екінші орында Астана – 474 мың теңге, ал үшінші орында Шымкент – "шаршы" үшін 420 мың теңге. Атырау мен Өскемен де салыстырмалы түрде жоғары бағамен ерекшеленді – сәйкесінше 389 мың және 383 мың теңге.

Ең арзан баспана Қызылордада сатылуда – шаршы метрі шамамен 234 мың теңге.

Сондай-ақ "арзан" қалалар тізіміне Ақтөбе (282 мың теңге), Тараз (302 мың теңге), Талдықорған (307 мың теңге) және Көкшетау (308 мың теңге) кірді.

Сарапшылардың пікірінше, бағаның ағымдағы төмендеуі соңғы жылдары сұраныстың болмауына байланысты.

Еске салайық, қазақстандықтардың зейнетақы жинақтарының бір бөлігін тұрғын үй сатып алуға жұмсау мүмкіндігі бар, алайда ең төменгі жеткіліктілік шегі көтерілгеннен кейін мұны жеке зейнетақы шоттарында ірі соманы жинақтап үлгерген қазақстандықтар қолдана алады.