Қазақстан неге шетелден несие алмақ: Қаржы министрлігі өкілі түсіндірді

Қаржы вице-министрі Ержан Біржанов Қазақстан экономикасын қолдау мақсатында алынады деп жоспарланған халықаралық несие туралы айтты. Бұл туралы KAZ.NUR.KZ хабарлайды.

"Біз сыртқы факторларға көбірек тәуелдіміз және біз негізінен шикізатты (экспортқа – ред. ескертпесі) жіберетінімізді білесіздер. Мысалы, мұнайды қарасаңыз, биылғы жылы бізде өндіріс төмендеген жоқ. Екіншіден, тау-кен металлургия кешенінің өнімдерінің айтарлықтай өсуі байқалмады, бірқатар экспортталатын тауарларға бағаның төмендеуі байқалды. Әрине, бюджет кірісіне әсер етті", - деді Ержан Біржанов.

Вице-министр бюджетке су тасқыны да әсер еткенін айтты.

"Бұлар жоспарланбаған... Тұрғын үймен қамтамасыз ету – бір мәселе. Инфрақұрылым резервтер есебінен бюджеттен қаржыландырылып, қалпына келтірілді. Иә, тапшылық болды, қазір жабылып жатыр. Биылғы жылы қабылданған барлық әлеуметтік міндеттемелер жабылады", - деп сендірді вице-министр.

Біржановтың айтуынша, несие механизмі тек Қазақстанға ғана емес, басқа елдердің экономикасына да тән.

"Бізде барлық келісім бар, қарыз алу нормалары сақталған және негізінен болашақта қосымша жұмыс орындары мен бюджетті толықтыратын инфрақұрылымдық жобаларға қаржы бөлінуде. Келесі кезеңге база болуы керек, сондықтан механизмдер қабылданады", - деп түсіндірді Ержан Біржанов.

Бүгін Қазақстан бюджет тапшылығына байланысты Азия банктерінен 105 миллиард йен несие алатыны белгілі болды. Мәжілісте Қазақстан Республикасының экономикасын қолдау үшін Азия инфрақұрылымдық инвестициялар банкі мен Азия даму банкінен 15 жылға несие беру туралы екі заң жобасы қаралды.