Қазақстандықтар қолма-қол ақшаны жиі қолдана ма: Ұлттық банк басшысы пікір білдірді

Ұлттық банк басшысы Тимур Сүлейменов қазақстандықтар қолма-қол ақшаны пайдаланудан бас тарта ма деген сұраққа жауап берді. Оның сөзінше, қаңтар айында елімізде мобильді аударымдарды бақылау кезінде қолма-қол ақшаға сұраныс көбейген, деп хабарлайды KAZ.NUR.KZ тілшісі.

Тимур Сүлейменов мобильді аударымдарды фискализациялау кезінде елімізде қолма-қол ақшаға сұраныс артқанын мойындады.

"Бірнеше қала мен пункттерде, кей банктерді қосымша қолма-қол ақшамен қамтамасыз етуге тура келді.

Бірақ сол кезден кейін жағдай реттеліп, Қаржы министрлігі мен Ұлттық экономика министрлігі үндеу жасады. Менің ойымша, қазақстандықтар аударым жүйесіне үйренген, көбі түсінеді, қазір қолма-қол ақшаға қатысты мәселе жоқ", - деді ол.

Естеріңізге сала кетейік, кеше мәжіліс депутаттары үкіметке тексерілуге жататын мобильді аударымдар көлемін арттыруды ұсынған еді. Олар қазіргі тексеру бойынша қойылған меже кәсіпкерлердің қалтасын қағады деп есептейді.

Мәтіннен қате тапсаңыз, бізге жазыңыз