Қазақстандықтар депозит бойынша жаңа рекорд орнатты

Азаматтар қазақстандық банктерде 30 трлн теңгеден астам қаражат жинақтады. Бұл – барлық уақыттағы тарихи ең жоғары көрсеткіш. Соманың басым бөлігі теңгемен сақталған. Толығырақ KAZ.NUR.KZ материалынан оқыңыз.

Қазақстандық банктердегі депозиттер көлемі өсіп жатыр. Қазақстан Ұлттық банкінің деректеріне сәйкес, 2026 жылғы маусымда жеке тұлғалардың салымдарының жалпы сомасы 30 трлн теңгеден асты. Жыл басынан бері бұл көрсеткіш 6,71 пайызға, ал бір жыл ішінде 18,32 пайызға өскен.

Қазақстандықтар қаражатының басым бөлігін ұлттық валютада сақтайды. 2026 жылғы маусымда теңгедегі салымдар шамамен 24,06 трлн теңгені құрады, яғни бұл жалпы соманың 80 пайыздан астамы. Шетел валютасындағы депозиттерде небәрі 5,95 трлн теңге (20 пайыз).

Теңгедегі салымдар неге көп?

Теңгедегі салымдардың тез өсуінің басты себептерінің бірі – сыйақы мөлшерлемелері. Шетел валютасындағы депозиттер бойынша мөлшерлеме 1 пайыздан аспайды.

Ұлттық валютадағы салымдар бойынша мөлшерлемелер елдегі инфляция деңгейінен айтарлықтай жоғары, бұл нақты табыс алуға мүмкіндік береді.

Мәселен, Қазақстан Ұлттық банкінің деректері бойынша, маусым айында ашылған теңгедегі депозиттердің орташа сыйақы мөлшерлемесі 14,7 пайызды құрады. Бір ай ішінде ол 0,1 пайыздық пунктке төмендегенімен, бұл капиталды сақтау және көбейту үшін әлі де жоғары көрсеткіш саналады.

Мәтіннен қате тапсаңыз,бізге жазыңыз