Төлеби ауданында халықаралық деңгейдегі тау шаңғысы курорты салынып жатыр

Түркістан облысы Төлеби ауданында жыл бойы туристік қызмет көрсететін халықаралық деңгейдегі тау шаңғысы курортының құрылысы жүргізіліп жатыр. Бұл туралы Otyrar.kz хабарлайды.

"Қасқасу туристік-рекреациялық кешенінің" аумағында бірнеше қонақүй, мейрамхана, аспалы жол және бассейн салу жоспарлануда. Жоба бойынша шаңғы трассасы 1880-3155 құламасы метрді, ал жалпы ұзындығы 33,4 шақырымды құрайды. Кешен толығымен іске қосылғанда жылына шамамен 120 000 демалушы қабылданады және 2 000-нан астам адам жұмыспен қамтылады деп күтілуде.

Жалпы Төлеби ауданында демалушыларға қызмет көрсететін орындар саны 194 нысанға жетті. Сондай-ақ ауданда жыл басынан бері құны 1,2 млрд теңге болатын төрт туристік нысан ашылды. Бүгінде туризм саласын дамыту және инвестициялар тарту үшін Біркөлік, Ақмешіт, Қасқасу елдімекендерінде туристік-рекреациялық аймақтарды дамыту жоспары әзірленуде.

Айта кетейік, туризмді дамыту мақсатында ауданда 2024-2030 жылдары жалпы сомасы 78,1 млрд теңгеге ірі жобаларды іске асыру жоспарлануда.

Мәтіннен қате тапсаңыз, бізге жазыңыз