"Қарыз пайда болуына әкелуі мүмкін": Мемлекеттік кірістер комитеті төлемдерге қатысты жаңа талаптарды еске салды

Мемлекеттік кірістер комитетінің өкілдері бюджетке төлемдер жасау кезіндегі жаңа талаптар туралы айтты. Бұл туралы ведомствоға сілтеме жасаған KAZ.NUR.KZ хабарлайды.

"2025 жылғы 13 қаңтардан бастап Қазақстанда Ұлттық банктің жүзеге асыруымен ISO 20022 халықаралық стандартты төлем хабарламаларының форматы енгізілді. Өтпелі кезең елдің төлем жүйелерін, екінші деңгейлі банктердің ақпараттық жүйелерін және басқа төлем нарығының қатысушыларын қамтиды.

Осыған байланысты Қазақстан Республикасының аумағында қолма-қол ақшасыз төлемдер мен ақша аударымдарын жүзеге асыру қағидаларына (Қазақстан Ұлттық банкінің 2016 жылғы 31 тамыздағы № 208 Қаулысымен бекітілген) өзгерістер енгізілді, сондай-ақ бюджетке төлемдер жасау үшін жаңа төлем тапсырмасының формасы бекітілді.

Негізгі өзгеріс – жаңа "Нақты төлеуші" графасы" , - делінген хабарламада.

Мемлекеттік кірістер комитетінің өкілдері салықтар мен төлемдердің дұрыс есепке алынуы үшін оны толтыру тәртібіне назар аудару қажеттігін еске салды.

• Заңды тұлғалар өздерінің құрылымдық бөлімшелері үшін салықтар мен әлеуметтік төлемдерді төлеген кезде жиынтық төлем тапсырмасының "Нақты төлеуші" бағанында тиісті құрылымдық бөлімшенің атауы мен БСН көрсету қажет.
• Сот орындаушылары борышкерлердің міндеттемелері бойынша төлемдерді аударған кезде төлем тапсырмасының "Нақты төлеуші" бағанында борышкердің ТАӘ және ЖСН көрсету қажет.

"Нақты төлеуші" графасында мәліметтердің дұрыс көрсетілмеуі қаражаттың дұрыс есепке алынбауына және қарыз пайда болуына әкелуі мүмкін. Ұлттық банк талаптарын төлем тапсырмаларын толтыруда қатаң сақтаңыз. Кез келген сұрақтар туындаған жағдайда екінші деңгейлі банктерге жүгініңіз", - деп ескертті комитет өкілдері.

Комитет салық төлеушілерді төлем құжаттарын рәсімдеу кезінде мұқият әрі жауапты болуға шақырады.