37,8 млрд теңге қарызға байланысты алматылықтардың жарығы өшірілуі мүмкін

Алматы қаласы мен Алматы облысында электр энергиясы үшін қарыз күрт өсті. "Алатау Жарық Компаниясы" АҚ-ның "Энергосбыт" филиалы мәліметінше, 2026 жылғы 1 сәуірдегі жағдай бойынша тұтынушылардың жалпы қарызы 37,8 млрд теңгеге жеткен.

Компания бұл жағдай өңірді тұрақты электрмен жабдықтауға әсер етуі мүмкін екенін ескертеді.

Уақтылы төлемнің болмауы қаражат тапшылығына әкеліп, сондай-ақ электр энергиясын бірыңғай сатып алушы – "Жаңартылатын энергия көздерін қолдау жөніндегі қаржы-есеп айырысу орталығы" ЖШС алдында қарыздың қалыптасуына себеп болды.

Күзгі-қысқы жылыту кезеңінің аяқталуына байланысты "Энергосбыт" қарызы бар тұтынушыларға электр энергиясын беруді шектеу және ажырату іс-шараларын бастауды жоспарлап отыр.

Компания электр энергиясы үшін төлем толық көлемде және белгіленген мерзімде жүргізілуі тиіс екенін еске салады. Бұл талаптардың орындалмауы жарық беруді шектеуге негіз болуы мүмкін.

Компания қарызы бар тұтынушыларды мүмкіндігінше тезірек берешекті толық өтеуге шақырады.

Сонымен қатар көппәтерлі үйлердің тұрғындарынан басқарушы ұйымдардың коммуналдық қызметтерге төлемдерді жинау және бөлу жұмысын бақылауда ұстауды сұрайды.

Төлем жасалмаған жағдайда заңнамада көзделген шаралар қолданылуы мүмкін, оның ішінде электр энергиясын беруді шектеу немесе ажырату, қарызды өндіріп алу үшін сотқа жүгіну, сондай-ақ сот шешімдерін мәжбүрлі түрде орындау.

Мәтіннен қате тапсаңыз, бізге жазыңыз