Ресей Қазақстан мұнайын Германияға экспорттауды тоқтатуы мүмкін: энергетика министрі түсінік берді

Энергетика министрі Ерлан Ақкенженов "1 мамырдан бастап Ресей Германияға қазақ мұнайының экспортын тоқтатуы мүмкін" деген ақпаратқа қатысты түсініктеме берді, деп хабарлайды KAZ.NUR.KZ тілшісі.

Өңірлік экологиялық саммит кулуарында Ерлан Ақкенженов Ресейдің Қазақстан мұнайын Германияға экспорттауды тоқтататыны туралы ақпарат рас болуы мүмкін екенін мәлімдеді.

"Мен бұл ақпаратты бейресми дереккөздерден алдым. Ресей Федерациясынан әлі ресми мәлімдеме болған жоқ. Бірақ бейресми дереккөздер арқылы біз оның рас екенін білеміз.

Мамырда бізде "Атырау-Самара" құбыры арқылы транзит, содан кейін "Дружба" құбыры, содан соң Шведт мұнай өңдеу зауытына транзит бар. Ресей тарабы, бейресми дереккөздерге сүйенсек, қазақстандық мұнайды айдауға техникалық мүмкіндіктері жеткіліксіз деп мәлімдеп отыр. Бұл, ең алдымен, Ресей инфрақұрылымына жасалған соңғы шабуылдарға байланысты болуы мүмкін. Мен осылай болжап отырмын" - деп атап өтті Ақкенженов.

Ол әріптестерімен сөйлескенін және техникалық мүмкіндік мәселесі шешілгеннен кейін Қазақстан мұнайының транзиті қайта басталатынын атап өтті.

"Әрине, біз бұл көлемді басқа бағыттарға бөліп жатырмыз. Оның ішінде КҚК құбыры, басқа бағыттар, Қытайдың көрсететін қызметі және т.б. кіреді. Жоқ, өндірісті азайту көзделмеген. Бұл көлемді басқа бағыттар бойынша қайта бөлу мүмкіндігі бар. КҚК-ның жағдайы тұрақты, бәрі қалыпты жүріп жатыр, бәрі жақсы", - деп қорытындылады сөзін энергетика министрі.

Мәтіннен қате тапсаңыз, бізге жазыңыз