Қазақстанда тұрғын үйге деген сұраныс үшінші ай қатарынан азайды

Қыркүйекте Қазақстанда 35 406 тұрғын үйді сатып алу-сату шарты жасалды. Бір ай ішінде сұраныс 1,1 пайыз, ал бір жылда бірден 14,3 пайыз төмендеді. Көбінесе 1 бөлмелі пәтерлер сатылған, деп хабарлайды KAZ.NUR.KZ.

Қыркүйекте, Ұлттық статистика бюросының деректері бойынша, Қазақстанда тұрғын үйді сатып алу-сату бойынша 35 406 мәміле тіркелді.

Бір ай ішінде олардың саны 1,1 пайыз, ал бір жылда бірден 14,3 пайыз төмендеді. Қазақстанда тұрғын үйге деген сұраныс қатарынан үшінші ай бойы төмендеп келеді.

Қай өңірде тұрғын үй көп сатылды

Өңірлер бойынша мәміле саны жағынан Алматы көш бастады – 7 248 келісімшарт. Алайда бұл тамызбен салыстырғанда 5,7 пайыз, ал былтырғы көрсеткіштен бірден 18,2 пайыз аз.

Одан кейінгі орында Астана тұр – 6 119 мәміле. Бір ай ішінде сұраныс 4,4 пайыз, ал бір жылда 29,2 пайыз құлдырады.

Үшінші орын Қарағанды облысында – 2 540 мәміле. Бір айда сұраныс 10,1 пайыз, ал бір жылда 16,1 пайыз азайған.

Тұрғын үйлер ең аз сатылған өңір – Ұлытау облысы, онда бар болғаны 280 шарт жасалған. Бұл бір ай бұрынғыдан 1,1 пайыз артық, бірақ бір жыл бұрынғы көрсеткіштен бірден 8,5 пайыз аз.

Қазақстандықтар көбінесе 1 бөлмелі пәтерлерді сатып алды. Ондай 10 434 мәміле тіркелген. Одан кейін 2 бөлмелі пәтерлер – 10 006 мәміле.

Жеке тұрғын үйлер бойынша 8 310 мәміле, ал 3 бөлмелі пәтерлер бойынша небәрі 5 444 мәміле тіркелді.

Мәтіннен қате тапсаңыз, бізге жазыңыз