Декларация тапсырмаған қазақстандықтардың шоттары бұғатталады

16 қыркүйекте Қазақстанда жалпыға бірдей декларациялаудың үшінші кезеңі аясында декларацияларды қабылдау аяқталды. Оны тапсырмағандарға ескерту жасалып, шоттары бұғатталады.

Қазақстанда жалпыға бірдей декларациялаудың үшінші кезеңі аясында декларацияларды қабылдау 16 қыркүйекте ресми түрде аяқталды. Еске сала кетейік, оған жеке кәсіпкерлер, басшылар, заңды тұлғалардың құрылтайшылары және олардың жұбайлары қатысты.

Бұл жүйеге алғаш рет кірген азаматтар 250-нысан бойынша активтері мен міндеттемелері туралы "енгізілген" декларацияны, ал қалғандары 270-нысан бойынша кірістер мен мүліктер туралы декларацияны тапсыруға тиіс.

Жалпы, Мемлекеттік кірістер комитетінің мәліметінше, биыл 2 миллионнан астам жеке тұлға алғашқы декларациясын тапсырған. Дегенмен, белгілі бір себептермен мұны істемегендер де бар. Олардың барлығына ескертулер жіберіліп қойған.

"Декларация ұсынбаған салық төлеушілерге салық заңнамасында белгіленген мерзімде салық есептілігін ұсынбағаны туралы хабарлама жіберілді", - делінген комитеттің хабарламасында.

Хабарламаны алғаннан кейін азаматтарға декларация немесе түсініктеме беруге небәрі 30 күн мерзімі бар. Тәртіп бұзушылардың банктік шоттары бұғатталады.

Мәтіннен қате тапсаңыз, бізге жазыңыз