"Сән-салтанат салығы": жаңа Салық кодексі аясында қандай қымбат тауарлар үшін салық мөлшерлемесі артады

Қазақстанда кейбір қымбат тауарлар үшін салық мөлшерлемесін арттыру ұсынылып отыр. Бұл туралы бүгін мәжілісте Салық кодексінің жаңа редакциясын таныстырған премьер-министрдің орынбасары – ұлттық экономика министрі Серік Жұманғарин айтты, деп хабарлайды KAZ.NUR.KZ.

"Біз "сән-салтанат салығы" деп аталатын тауарлардың жекелеген санаттарына жоғары салық салуды ұсынамыз.

Ол үшін жылжымайтын мүлік құны 450 миллион теңгеден асатын болса, мүлік салығының мөлшерлемесін ұлғайту ұсынылады.

Сондай-ақ құны 75 миллион теңгеден асатын жеңіл автомобильдерге, сондай-ақ қымбат теңіз кемелері мен ұшу аппараттарына акциздер енгізу жоспарлануда.

Әділдік мақсатында қымбат алкогольдік сусындар мен сигараларға 10 пайыз акциздер ұсынылады", - деді Серік Жұманғарин.

Айта кетейік, жаңа Салық кодексінің жобасында қосылған құн салығының мөлшері 16 пайыз, қосылған құн салығы бойынша шек 40 миллион теңге мөлшерінде белгіленді.