Енді барлық қазақстандық баспана кезегіне тұра алады

Бұған дейін тұрғын үй кезегіне тек белгілі бір санаттағы азаматтар ғана тұра алатын еді. Ал 2025 жылдан бастап бұл мүмкіндік елдегі барлық тұрғынға қолжетімді болмақ. Бұл туралы толығырақ KAZ.NUR.KZ материалынан оқи аласыздар.

Баспана кезегінің жаңа форматы

Қазақстанда "Отбасы банкін" ұлттық даму институтына айналдырылу процесі жүріп жатыр. Бұл өзгеріс тұрғын үй бағдарламаларының жұмысына әсер етпейді. Тұрғындар бұрынғыдай ипотека рәсімдеп, баспана ала береді. Сонымен қатар осы бағдарламалар аясында несиелеудің белгілі бір жеңілдік шарттары да сақталады.

Krisha.kz порталының жазуынша, банк трансформациясымен қатар тұрғын үй кезегінің форматы да өзгереді – енді ол барлық дерлік қазақстандыққа қолжетімді болып, әкімдіктерден жаңа ұлттық мекемеге ауысады.

Кезекке кім тұра алады

Мемлекеттен тұрғын үй алуға кезекке тұру үшін негізгі шарттар мыналар:

• Соңғы бес жылда жеке тұрғын үйінің болмауы;
• Немесе жалғыз баспанасының қауіпті деп танылуы.

Баспана бөлуде тұрғынның кезекке тіркелген күні ескеріледі. Әлеуметтік осал топтар үшін басымдық сақталады: оларға бөлінген тұрғын үйдің 70 пайызы тиесілі болады.

Табыс деңгейі әсер ете ме

Табыс деңгейіне қарай әртүрлі қолдау шаралары ұсынылады:

• Егер отбасының әрбір мүшесінің табысы ең төменгі күнкөріс деңгейінде болса (2024 жылы бұл көрсеткіш 43 407 теңге), жалдау ақысының 50 пайызын субсидиялау немесе әкімдіктен жалға берілетін тұрғын үй қарастырылады.
• Табысы жоғары тұрғындар үшін төменгі бастапқы жарнамен және 2 немесе 9 пайыз мөлшерлемемен ипотека ұсынылады. Жылдық тиімді мөлшерлеме тиісінше 2,1 пайыз және 11,8 пайыз болуы мүмкін.

Krisha.kz сондай-ақ барлық қазақстандықтар үшін баспана кезегіне тұру мүмкіндігі 2025 жылдың 24 мамырында ашылатынын атап өтті.