Қой-Таштағы жағдай: Атамбаев үйінің қасында қазір не болып жатыр?

Кеше Бішкек маңындағы Қой-Таш ауылында жаппай тәртіпсіздіктер орын алды. ҰҚМК ол жерде экс-президент Алмазбек Атамбаевты тұтқындау үшін арнайы операцияны іске асырмақ болған. Алайда, бұрынғы мемлекет басшысының жақтастары арнайы жасаққа айтарлықтай тойтарыс берді. Сол себепті, құқыққорғау қызметкерлері кері шегінуге мәжбүр болды. Бүгін Атамбаевтың коттеджінің қасына тағы да адамдар жиыла бастады деп хабарлайды АКИpress басылымына сілтеме жасаған KAZ.NUR.KZ.

Басылымның мәліметінше, Атамбаевтың жақтастары таң атысымен оның үйінің қасына жинала бастаған. Алдын ала мәліметке сәйкес, қазіргі уақытта олардың саны 500 адамнан асады.

Бұған дейін Қырғызстанның социал-демократиялық саяси кеңесінің мүшесі Фарид Ниязов Атамбаев та өз үйінде екенін мәлімдеген болатын.

Экс-президенттің коттеджінде кеше болған шабуыл кезінде ұсталған арнайы жасақ қызметкерлері де бар.

Қырғызстанның ІІМ хабарлауынша, тұтқынға алынған адамдар мен оларға қатысты ақпарат әзірге жоқ. Алайда ҚСДП саяси кеңесінің мүшесі Эрмек Окенов "Апрель" телеарнасының тікелей эфирінде алты спецназ сарбазының дәрігерлер бақылауында жатқанын мәлімдеді.

Оған қоса, ол Қой-Ташта әлі де байланыс пен интернеттің жоқ екенін жеткізді.

Сағат 11:00 шамасында Атамбаевтың үйінің алдында "Ұлттық штабтың" жиналысы өтуі тиіс. Бұрынғы президент жиылған көпшіліктің алдына шығады.

Мәтіннен қате тапсаңыз, бізге жазыңыз