RU

Президентке коронавирусқа қатысты елдегі ахуал туралы есеп берілді

Тоқаев пен Мамин
Фото: Ақорда

Премьер-министр Асқар Мамин мемлекет басшысы Қасым-Жомарт Тоқаевқа еліміздің санитарлық-эпидемиологиялық ахуалы мен әлеуметтік-экономикалық дамуының өзекті мәселелері жайында есеп берді деп хабарлайды Ақорда.

Үкімет басшысы республикадағы санитарлық-эпидемиологиялық ахуал бақылауда екенін, күнделікті жаңадан індетке шалдыққандардың саны 0,4 пайызға өсіп отырғанын, еліміз бойынша коронавирустың өршу деңгейінің көрсеткіші 0,9 пайызды құрайтынын айтты.

Жұқпалы аурулар ауруханаларының 28 пайызында, жансақтау бөлімдерінің 20 пайызында адамдар емделіп жатыр.

Қазіргі уақытта COVID-19 індетінің таралу қарқыны бойынша Атырау облысы "қызыл аймақта", Қостанай, Ақмола, Павлодар және Солтүстік Қазақстан облыстары "сары аймақта", қалған өңірлердің барлығы "жасыл аймақта" тұр.

19 желтоқсанда отандық QazCovid-in вакцинасын клиникалық сынақтан өткізудің соңғы ІІІ сатысы басталған. Оның шеңберінде 3 мың ерікті азаматқа екпе егілуде.

2021 жылы наурыз айында Жамбыл облысы Қордай ауданында жылына қуаты 60 миллион мөлшерде вакцина шығаруға жететін биофармацевтикалық зауыт пайдалануға беріледі.

Сонымен бірге Қарағанды қаласында ресейлік "Спутник V" вакцинасын шығару өндірісін іске қосуға дайындық жұмыстары жүріп жатыр.

Мемлекет басшысына инвестиция тарту, өңірлерді дамыту жобаларын жүзеге асыру, халықты жұмыспен қамту және еліміздің әлеуметтік-экономикалық дамуының өзге де өзекті мәселелері жөнінде баяндалды.

Еске салайық, елімізде өткен тәулікте коронавирус жұқтырған тағы 652 адам тіркелген. Осылайша, қазіргі уақытта Қазақстанда COVID-19 инфекциясы анықталғандар саны 146 584-ке жетіп отыр.

Сондай-ақ бір тәулікте коронавирустан алты адам қайтыс болған.

Мақаланың түпнұсқасы: https://kaz.nur.kz/politics/1890022-prezidentke-kazakstandagy-koronavirus-zagdajy-turaly-esep-berildi/