Джо Байден ресми түрде АҚШ-тың 46-шы президенті атанды (фото, видео)

Бүгін АҚШ-тың астанасы Вашингтонда жаңадан сайланған президент Джо Байденнің ұлықтау рәсімі өтіп, Байден ресми түрде АҚШ президенті атанды. Оқиға орнынан бейнетрансляция жүргізілуде.

Сағат 12:00-де ( Нұр-Сұлтан уақытымен 23:00-де) басталған ұлықтау рәсімінде жаңадан сайланған президент ант беріп, халқына үндеу жолдады. Салтанатты рәсім COVID-19 пандемиясы мен қауіпсіздік мәселелеріне байланысты жеңілдетілген форматта өткізілген.

Инаугурацияға қатысты өзге іс-шаралар Вашингтонда өтіп жатыр. Ұлықтау рәсімін төмендегі CNBC бейнетрансляциясынан тамашалауға болады.

Естеріңізге сала кетейік, бұған дейін инаугурация комитеті адамдарды іс-шараға жеке қатысуға емес, керісінше оны видеотрансляция арқылы көруге шақырған болатын.

Бұрынғы президент Дональд Трамп ұлықтау рәсіміне қатыспайтынын мәлімдеген еді. Ол Ақ үйден шығып, Флоридадағы резиденциясына бет алған.

Сонымен қатар, салтанатты рәсімге өзге экс-президенттер - Джордж Буш, Барак Обама және Билл Клинтон әйелдерімен келді.

БАҚ-тың ақпараты бойынша, ұлықтау рәсіміне шамамен 2 мың адам қатысуда. 20 мыңнан астамы - қауіпсіздікті қамтамасыз етуге міндетті күзетшілер.

"Мен, кіші Джозеф Робинетт Байден, Америка Құрама Штаттары президентінің міндеттерін адал орындауға және өз мүмкіндігімше Америка Құрама Штаттарының конституциясын қолдап, қорғауға салтанатты түрде ант беремін", - деді АҚШ-тың 46-шы президенті.

Ұлықтау рәсімінде АҚШ тарихындағы тұңғыш әйел вице-президент атанған Камала Харрис те ант берді.