Қарағанды әкімінің экс-орынбасары Жақсылық Шалабековке сот үкімі оқылды

Қарағандыдағы Қазыбек би ауданының соты қала басшысының бұрынғы орынбасары Жақсылық Шалабековке қатысты айыпты ауыстырып, оны бюджет қаражатын жымқырды деп емес, қызметтік өкілеттігін асыра пайдаланғаны үшін кінәлі деп таныды. Экс-шенеунік бір жарым жылға бас бостандығынан айырылды деп хабарлайды KAZ.NUR.KZ тілшісі.

"Жақсылық Шалабеков пен Ермек Қасеновтың бюджет қаражатын ұрлау туралы алдын-ала сөз байласу фактісі сотта расталмады. Айыптау сотқа дейінгі тергеу органының жорамалына негізделген.

Сонымен бірге, сот Қарағанды ​​қаласының құрылыс бөлімінің бастығы бола отырып, Жақсылық Шалабеков екі қосымша келісім жасасу арқылы аванстар беруге жол бергенін анықтады. Ал Ермек Қасенов осыны пайдаланып, алдау арқылы осы қаражаттың бір бөлігін иемденген. Сондықтан сот айыпталушыларға тағылған айыпты қайта ауыстырды", - дейді судья Саян Аққожин.

Жақсылық Шалабеков бір жарым жылға бас бостандығынан айырылды. Сондай-ақ ол өмір бойына мемлекеттік қызметте жұмыс істей алмайды. Жеңілдететін мән-жайлар ретінде оның 61 жаста екені және кішкентай балаларының бар болуы ескерілген.

Сот бизнесмен Ермек Қасеновты Қылмыстық кодекстің 190-бабы, 4-бөлігі "Аса ірі көлемдегі алаяқтық" бойынша кінәлі деп таныған. Оған бас бостандығынан 5 жылға шартты түрде айыру жазасы берілген. Келтірілген материалдық шығын мемлекетке қайтарылғаны хабарланды.

Еске сала кетсек, бұған дейін Қарағанды ​​қаласы әкімінің орынбасары Жақсылық Шалабековтің ұсталғаны туралы ақпарат желіде 2020 жылдың 13 қыркүйегінде пайда болған еді.

Кейінірек, шенеунікке нақты қандай айып тағылғаны белгілі болды. Жақсылық Шалабеков алдын ала сөз байласу арқылы бір топ адамдармен бюджет қаражатын жымқырды және жұмсады деген күдікке ілінген.