Ресей мен Украина келіссөздерінің үшінші раунды аяқталды: Тараптар қандай шешімге келді

Беларусь аумағында Ресей мен Украина арасындағы келіссөздердің үшінші раунды өтті. Келіссөздер барысында гуманитарлық дәліздер тақырыбы көтерілді.

Украина президенті кеңсесі басшысының кеңесшісі Михаил Подоляк Twitter әлеуметтік желісіндегі парақшасында гуманитарлық дәліздердің логистикасын жақсартуда аздаған оң өзгеріс бар екенін мәлімдеді.

Сондай-ақ ол атысты тоқтату, қауіпсіздікке кепілдік беру және басқа да негізгі саяси мәселелер тұрғысынан қарқынды консультациялар жалғасып жатқанын алға тартты.

"Қазіргі уақытта жағдайды айтарлықтай жақсартатын нәтижелер жоқ", – деп сөзін түйіндеді Подоляк.

Келіссөздер қорытындысын Ресей тарабы да ұсынды. Брифинг жазбасын ТАСС агенттігі Telegram-арнасында жариялады.

Ресей президентінің көмекшісі Владимир Мединскийдің айтуынша, Украина делегациясымен гуманитарлық дәліздер мәселесі талқыланған. Ол бұл дәліздер 8 наурызда іске қосылады деп үміттенінін жасырмады.

"Украина тарабы солай болатынына сендірді", – деп атап өтті Мединский.

Сондай-ақ, ол саяси блок бойынша да талқылаулар өткенін мәлімдеді. Алайда, оның сөзінше, бұл тұрғыда "оң нәтиже туралы айтуға әлі ерте".

Мединскийдің сөзінше, Ресей делегациясы Украинамен келіссөздерде нақты келісімге келгендей болған тармақтардың бір бөлігі бойынша ең болмағанда хаттамаға қол қойылады деп үміттенген.

Бірақ Украина тарабы құжаттарды талқылау үшін өзімен алып кетіп, оған қол қоймады, дейді ол.

"Шынымды айтсам, келіссөздерден күткен үмітіміз ақталған жоқ. Біз келесі жолы алға қарай маңызды қадам жасай аламыз деп үміттенеміз", – деп түйіндеді Мединский.

Ол келіссөздер жалғасын табатынын жеткізді.

Мәтіннен қате тапсаңыз, бізге жазыңыз