ҰҚШҰ тұрақты кеңесі отырысында Тасмағамбетов ұйымның бас хатшысы ретінде таныстырылды

Ұжымдық қауіпсіздік туралы шарт ұйымының тұрақты кеңесінің отырысында Беларусь елінің өкілі Александр Вольфович ұйымның жаңа бас хатшысы Иманғали Тасмағамбетовті таныстырды. Бұл туралы Мәскеудегі Беларусь елшілігі Telegram-арнасында хабарлады, деп жазады KAZ.NUR.KZ.

"Беларусь республикасы Қауіпсіздік кеңесінің мемлекеттік хатшысы Александр Вольфович ҰҚШҰ тұрақты кеңесінің отырысында ұйымның жаңа бас хатшысы, Қазақстанның өкілі Иманғали Тасмағамбетовті таныстырды", - делінген елшіліктің хабарламасында.

Сондай-ақ кеңес отырысынан кейін БАҚ-қа сұхбат берген Александр Вольфович Тасмағамбетовтің жақын арада Минскке баруды жоспарлап отырғанын атап өткен.

Еске сала кетейік, былтыр қараша айында Ереванда өткен ҰҚШҰ-ның Ұжымдық қауіпсіздік кеңесінің отырысында Иманғали Тасмағамбетов алдағы үш жылда ҰҚШҰ-ның бас хатшысы қызметін атқаратыны белгілі болған еді.

Бұл қызметті Тасмағамбетовке дейін яғни, 2020 жылдың 1 қаңтарынан Беларусь елінің өкілі Станислав Зась атқарған болатын.