Атырау облысының бұрынғы әкімі жаңа қызметке тағайындалды

Атырау облысының бұрынғы әкімі Махамбет Досмұхамбетов "ҚМГ Инжиниринг" ЖШС-нің бас директорының бірінші орынбасары болып тағайындалды. Бұл туралы компанияның ресми сайтында хабарланды.

"ҚазМұнайГаз" ҰК АҚ басқармасының 30 қаңтар мен 1 ақпандағы отырыстарында бірқатар шешім қабылданды.

Оған сәйкес, 2023 жылдың 31 қаңтарынан бастап Бақытжан Хасановтың "ҚМГ Инжиниринг" ЖШС-нің бас директоры (басқарма төрағасы) ретінде өкілеттігі тоқтатылды. 2023 жылдың 1 ақпанынан бастап Мәлік Сәлімгереев "ҚМГ Инжиниринг" ЖШС бас директоры (басқарма төрағасы) болды.

Махамбет Досмұхамбетов 1 ақпанда компанияның басқарма мүшесі болып сайланды, сонымен қатар ол "ҚМГ Инжиниринг" ЖШС бас директорының өндіріс мәселелері бойынша бірінші орынбасары лауазымына тағайындалды.

"ҚМГ Инжиниринг" ЖШС-нің басқармасының қазіргі құрамы мынадай:

• Мәлік Сәлімгереев – бас директор (басқарма төрағасы);
• Махамбет Досмұхамбетов – басқарма мүшесі;
• Жәнібек Нұғманов – басқарма мүшесі;
• Асылжан Дәулетов – басқарма мүшесі;
• Ренат Хайретдинов – басқарма мүшесі;
• Бақыт Иманбаев – басқарма мүшесі;
• Рахым Өтеев – басқарма мүшесі.

Айта кетейік, Махамбет Досмұхамбетов 2019 жылдың желтоқсан айынан бастап 2022 жылдың 7 сәуіріне дейін Атырау облысының әкімі болған еді.

Еске салайық, бұған дейін бұрынғы Экология министрі Серікқали Брекешев "ҚазМұнайГаз" АҚ-ның басқарма төрағасының орынбасары болып тағайындалған еді.