Дәнекерлеушіден металлургке дейін: Балқашта оқушылар кәсіби шеберлік чемпионатында бақ сынады

20 қаңтарда «Қазақмыс» корпорациясының политехникалық колледжінде «JasSkills Kazakhmys 2023» кәсіби шеберлік чемпионаты өтті. Өз құзыретіндегі үздік атағы үшін Балқаш, Приозерск және Ақтоғай аудандарындағы орта мектептің 9 сынып оқушылары бақ сынасты.

«JasSkills Kazakhmys 2023» мақсаты-оқушылардың кәсіби бағдарлануы мен заманауи жұмысшы мамандықтарын игеруі үшін жаңа мүмкіндіктер жасау.

Чемпионат төрт құзырет бойынша өткізіледі: «Дәнекерлеу ісі», «Электромонтаж», «Слесарлық-жөндеу жұмыстары» және «Металлургия».

Бірінші кезеңде 217 үміткердің ішінен қатысушы мектептердің әрқайсысында үздік деп танылған 74 қатысушы іріктелді. Екінші кезеңде конкурсанттар әртүрлі тапсырмаларды орындап, жұмысшы мамандықтарға деген қызығушылықтарын ескере отырып, құзыреттерді таңдады. Нәтижесінде 20 қатысушы чемпионаттың финалистері атанды.

Чемпионаттың шешуші кезеңінде қатысушылар 2,5 сағат бойы өздерінің кәсіби дағдыларын көрсетті.

Барлық жүлдегер «Қазақмыс» корпорациясы мен Балқаш қаласының Жастар ресурстық орталығынан бағалы сыйлықтар, жүлделер мен Құрмет грамоталарын алды.