Тоқаев Ақордада аграрлық бизнес өкілдерімен кездесті (фото)

Ақордада мемлекет басшысы Қасым-Жомарт Тоқаев агроөнеркәсіп кешені саласындағы бизнес өкілдерімен кездесу өткізді. Жиында ауыл шаруашылығын дамытудың түйткілді мәселелері мен перспективалары талқыланды, деп хабарлайды Ақорда ресми сайтында.

Кездесуде президент былтыр ауыл шаруашылығы саласындағы өсім 9,1 пайызды құрағанын атап өткен.

Оның айтуынша, егін бітік шығып, диқандар 23 миллион тоннаға жуық астық жинаған. Сондай-ақ егіс алқаптарын әртараптандыру және мол өнім беретін дақылдар өсіруге көшу жұмыстары жоспарлы түрде жүргізіліп келеді. Майлы дақылдар өсіретін егіс көлемі шамамен 4 есе ұлғайып, 3,5 миллион гектарға жеткен.

Мемлекет басшысының сөзінше, бұл оң нәтижеге күнделікті еселі еңбегімен еліміздің азық-түлік қауіпсіздігін нығайтуға зор үлес қосып жүрген ауыл азаматтарының арқасында жетіп отырмыз.

Сонымен қатар жиында президент аграрлық саладағы бірқатар түйткілді мәселені ашық талқылау аясында қарастыруды ұсынған.

Кездесу барысында Ауыл шаруашылығы министрі Ербол Қарашөкеев, көпсалалы "Родина" кәсіпорнының директоры Иван Сауэр, "Олжа Агро" ЖШС-нің бас директоры Айдарбек Қожаназаров, "Зенченко және К" шаруа серіктестігінің директоры Геннадий Зенченко, "Майлы дақылдардың тәжірибелік шаруашылығы" ЖШС-нің директоры Фарид Әбітаев сөз сөйлеген.

Олар өндірісті әртараптандыру, шикізатты терең өңдеу және жаңа агроөнімдерді өндіру, қант саласын дамыту, тұқым шаруашылығы, мал шаруашылығы және ветеринария, сондай-ақ ішкі нарықты қамтамасыз етіп, экспорттық әлеуетті арттыру мәселелерін қозғаған.

Жиын барысында агроөнеркәсіп кешенін дамытуға қаражат бөлу мен пайдаланудың тиімділігі, жер және су ресурстарын әділ бөлу мәселелеріне де ерекше назар аударылған.

Аграрлық бизнес өкілдері ауылдарда өмір сүру сапасын арттыру, жол-көлік және әлеуметтік инфрақұрылымның, оның ішінде мектептер мен балабақшалардың жағдайын жақсарту, сондай-ақ кадр даярлау қажеттігін атап өткен.

Президент баяндамаларды тыңдап, үкіметке айтылған барлық ұсынысты назарға алуды және кәсіпкерлердің пікірін ескере отырып, ауыл шаруашылығының жай-күйіне мұқият талдау жүргізуді тапсырған.

Мемлекет басшысының пікірінше, агроөнеркәсіп кешені өкілдерімен мұндай кездесулерді тұрақты түрде өткізіп тұру керек. Себебі, ауыл шаруашылығындағы мәселелердің шешімін табуы азаматтардың өмір сүру сапасына ғана емес, сонымен қатар елдің азық-түлік қауіпсіздігіне де ықпал етеді.