Ұлттық экономика министрінің інісі "Қазатомөнеркәсіпте" басшылық қызметке тағайындалды
Опубликовано:
Ермек Қуантыров "Қазатомөнеркәсіп" Ұлттық атом компаниясы" АҚ-ның құқықтық сүйемелдеу және сатып алу жөніндегі бас директоры болып тағайындалды. Бұл туралы ұлттық атом компаниясы ресми сайтында хабарлады.
"Ермек Қуантыров 2023 жылғы 5 шілдеден бастап "Қазатомөнеркәсіптің" құқықтық сүйемелдеу және сатып алу жөніндегі бас директоры лауазымына тағайындалды.
Қуантыров мырзаның функционалдық міндеттеріне құқықтық қамтамасыз ету процесіне басшылық жасау, халықаралық-құқықтық ынтымақтастық мәселелеріне жетекшілік ету, тәуекелдерді басқару және ішкі бақылау жөніндегі қызметті ұйымдастыру, сондай-ақ кешенді басқаруды жүзеге асыру және сатып алу процестері мен компанияның корпоративтік басқаруына басшылық жасау кіреді", - делінген хабарламада.
"Қазатомөнеркәсіп" баспасөз қызметінің мәліметінше, Ермек Қуантыров президенттік жастар кадрлық резервінің мүшесі, сонымен қатар Колумбия университетінің құқық магистрі (LL.M.) дәрежесіне ие.
Сондай-ақ ол Әділет министрлігінде әр түрлі басшылық лауазымдарда жұмыс істеген, соның ішінде Ұлттық зияткерлік меншік институтын (Қазпатент) басқарған.
"Қазатомөнеркәсіптің" құқықтық сүйемелдеу және сатып алу жөніндегі бас директоры лауазымына тағайындалғанға дейін Еуразиялық экономикалық комиссияның Кәсіпкерлік қызметті дамыту департаментінің директоры қызметін атқарған.
Айта кетейік, Ермек Қуантыров - Ұлттық экономика министрі Әлібек Қуантыровтың туған інісі.
Мақаланың түпнұсқасы: https://kaz.nur.kz/politics/2028076-ulttyq-ekonomika-ministrinin-inisi-qazatomonerkasipte-bassylyq-qyzmetke-tagaiyndaldy/
