Қазақстан Ресеймен +7 телефон кодын бірлесіп пайдалану туралы келісімді мақұлдады

Қазақстан Республикасы үкіметі басшысы Ресеймен дүниежүзілік нөмірлеудің 7-аймағының нөмірлеуін бірлесіп пайдалану туралы келісімге қол қойды. Бұл жөнінде құжатқа сілтеме жасаған KAZ.NUR.KZ хабарлайды.

Қаулы "Әділет" ақпараттық-құқықтық жүйесі порталында жарияланды.

Құжатқа сәйкес, Ресей мен Қазақстан дүниежүзілік нөмірлеудің 7-аймағының нөмірлеу аймақтарының кодтарын бекітеді.

Ортақ резервтегі нөмірлеу ресурсы тараптардың әрқайсысына тараптардың жеке келісім жасасуы арқылы бекітіледі.

Келісімді іске асыру жөніндегі уәкілетті органдар:

Қазақстан тарабынан – Қазақстан Республикасының Цифрлық даму, инновациялар және аэроғарыш өнеркәсібі министрлігі;

Ресей тарабынан – Ресей Федерациясының Цифрлық даму, байланыс және бұқаралық коммуникациялар министрлігі.

Қаулыға сәйкес, Қазақстанның айрықша пайдалануындағы кодтар диапазоны: 000 - 099, 600 - 699, 700 - 799.

Ресейдің айрықша пайдалануындағы кодтар диапазоны: 200 - 299, 300 - 399, 300 - 399, 500 - 599, 810 - 818, 820 - 821, 831, 833 - 836, 840- 848, 850 - 851, 855 - 857, 860 - 863, 865 - 867, 869, 871 - 873, 877- 880, 900 - 999 болады.

Екі ел бірлесіп пайдаланатын кодтар диапозоны: 100 - 199, 800 - 809, 881 - 899.

Нөмірлеу кодтарының диапазондарын бірлесіп пайдалануға байланысты мынай жайттар келісілген:

• нөмірлеу кодтарының бірлесіп пайдаланылатын диапазонында кодтарды өз мемлекеттерінің заңнамасына сәйкес өздері белгілейді;
• нөмірлеу кодтарының көрсетілген диапазонындағы нөмірлеуді өз мемлекеттерінің телефон желілерінде ғана пайдаланады.

Мәтіннен қате тапсаңыз, бізге жазыңыз