Ерлан Сәрсембаев әділет министрі болып тағайындалды

Ерлан Жақсылықұлы Сәрсембаев әділет министрі лауазымына тағайындалды. Бұл туралы Ақорда хабарлайды.

"Мемлекет басшысының Жарлығымен Ерлан Жақсылықұлы Сәрсембаев Қазақстан Республикасының Әділет министрі лауазымына тағайындалды", - делінген хабарда.

"Параграф" сайтындағы ақпаратқа сәйкес, Ерлан Сәрсембаев 1975 жылы туған. Алматы энергетика және байланыс институтын, Дінмұхамед Қонаев атындағы гуманитарлық университетті бітірген. Мамандығы – радиоинженер, заңгер.

Қорғаныс министрлігінде офицер, аға офицер, бөлім бастығы қызметтерін атқарып, Қазақстан Республикасының арнаулы мемлекеттік органдарында қызмет етті.

Премьер-министр кеңсесінде және сенат аппаратында түрлі басшылық қызметте жұмыс істеді. Ол сондай-ақ сенат аппаратының Халықаралық қатынастар, қорғаныс және қауіпсіздік комитетімен өзара іс-қимыл бөлімінің меңгерушісі қызметін атқарды.

Еске салайық, бұған дейін президент жарлығымен әділет министрі қызметін атқарған Азамат Есқараев лауазымынан босатылған болатын.

Мәтіннен қате тапсаңыз, бізге жазыңыз