Мырзағалиев "ҚазМұнайГаз" басқарма төрағасы болып тағайындалды

Президенттің бұрынғы кеңесшісі Мағзұм Мырзағалиев "ҚазМұнайГаз" ұлттық компаниясының басқарма төрағасы болып тағайындалды, деп хабарлайды "Самұрық-Қазына" қорының сайты.

"ҚР Президенті әкімшілігінің келісімі бойынша "Самұрық-Қазына" АҚ Басқармасының шешімімен Мағзұм Мырзағалиев "ҚазМұнайГаз" ҰК" АҚ Басқарма төрағасы болып тағайындалды", — делінген хабарламада.

Айта кетерлігі бүгін, 14 сәуірде Мағзұм Мырзағалиев Президент кеңесшісі қызметінен босатылғаны белгілі болды.

Мағзұм Маратұлы Мырзағалиев 1978 жылы 7 қарашада туған. 1999 жылы "Тұран" университетін "халықаралық экономист" мамандығы бойынша, 2003 жылы Сыртқы істер министрлігінің Дипломатиялық академиясын "халықаралық экономист" мамандығы бойынша тәмамдаған.

Сондай-ақ Ш. Есенов атындағы Каспий мемлекеттік технологиялар және инжиниринг университетінің "мұнай-газ кен орындарын игеру" мамандығы бойынша бітірген.

АҚШ-та және Малайзияда тағылымдамадан өткен.

2001 - 2004 жылдары Теңіз және Батыс Сібір кен орындарында MIDrillingFluidsInternational (Schlumberger) компаниясының бұрғылау ерітінділері бойынша инженері.

2004 - 2007 жылдары "MIDrillingFluidsInternational" компаниясының Ақтау қаласындағы филиалында бизнесті дамыту бойынша менеджер, өндіріс бойынша менеджер, филиал басшысы.

2007-2010 жылдары "ҚазМұнайГаз" ұлттық компаниясы» акционерлік қоғамының «ТеңізСервис» ЖШС Бас директоры.

2010-2012 жылдары – "ҚазМұнайГаз" ҰК" АҚ-ның басқарушы директоры.

2012-2013 жылдары – "ҚазМұнайГаз" ҰК» АҚ Басқарма төрағасының инновациялық даму және сервистік жобалар жөніндегі орынбасары.

2013-2014 жылдары – ҚР Мұнай және газ вице-министрі.

2014-2019 жылдары – ҚР Энергетика вице-министрі. 

2019-2021 жылдары – ҚР Экология, геология және табиғи ресурстар министрі. 2021-2022 жылдары – ҚР Энергетика министрі.

2022 жылғы қаңтардан бастап ҚР Президентінің кеңесшісі лауазымына тағайындалды.

Мәтіннен қате тапсаңыз, бізге жазыңыз