Шығыс Қазақстан облысы әкімінің жаңа орынбасары тағайындалды

Айдар Садырбаев Шығыс Қазақстан облысы әкімінің орынбасары қызметіне тағайындалды. Ол өңірдің әлеуметтік блогына, ішкі және ақпараттық саясат мәселелеріне жетекшілік ететін болады. Бұл туралы KAZ.NUR.KZ өңір әкімдігіне сілтеме жасап хабарлады.

Ведомствоның ресми сайтында жарияланған ақпаратқа сәйкес, президент әкімшілігінің келісімі және Шығыс Қазақстан облысының әкімі Нұрымбет Сақтағановтың өкімімен Садырбаев Айдар Серікқазыұлы облыс әкімінің орынбасары лауазымына тағайындалды.

Бүгін аймақ басшысы жаңа орынбасарын ұжымға таныстырып, жұмысына сәттілік тіледі.

Садырбаев Айдар Серікқазыұлы – 1986 жылы 25 қыркүйекте бұрынғы Семей облысы Жаңасемей ауданы Новопокровка ауылында дүниеге келген. Білімі жоғары.

2009 жылы Қазақ инновациялық гуманитарлық-заң университетін "Тарих" мамандығы бойынша тамамдап, еңбек жолын 2009 жылы Шығыс Қазақстан облысы Бородулиха ауданына қарасты Переменовка ауылының орта мектебінде мұғалімдік қызметтен бастаған.

Әр жылдары Бородулиха ауданы мен Семей қаласының ішкі саясат бөлімдерінде нұсқаушы, жетекші және бас маман, басшының орынбасары, басшы, Семей қаласы әкімінің орынбасары, AMANAT партиясының облыстық филиал төрағасы, Абай, Шығыс Қазақстан облыстарында ішкі саясат басқармаларының басшысы қызметтерін атқарды.

Айдар Садырбаев жаңа қызметінде өңірдің әлеуметтік блогына, ішкі және ақпараттық саясат мәселелеріне жетекшілік ететін болады.

Мәтіннен қате тапсаңыз,бізге жазыңыз