Қазақстанда жанар-жағармай материалдарын заңсыз шығару әрекеттеріне бақылау күшейеді

Бүгін үкімет басшысы Әлихан Смайылов ішкі нарықты жанар-жағармай материалдарымен қамтамасыз ету мәселелері жөнінде кеңес өткізді, деп хабарлайды премьер-министрдің ресми сайты.

Кеңеске қатысушылар жанар-жағармай материалдары нарығындағы қазіргі ахуалды және қолданыстағы реттеу механизмдерінің тиімділігін талқылаған.

Сондай-ақ шекарада дизель отыны мен бензинді басқа мұнай өнімдерінің түрлері ретінде (мазут, пеш отыны, еріткіштер және т.б.) заңсыз шығару әрекеттері орын алып жатқаны айтылған.

Осы орайда, премьер-министр Энергетика министрлігіне мүдделі мемлекеттік органдармен бірлесіп, әсіресе көктемгі егіс жұмыстарын жүргізу кезеңінде отынды елден заңсыз шығару фактілеріне бақылауды күшейту және ондай жағдайлардың жолын кесу жөнінде пәрменді шаралар қабылдауды тапсырған.

Отырыста мұнай-газ саласының басқа да өзекті мәселелері талқыланған.

Мәтіннен қате тапсаңыз, бізге жазыңыз