Тоқаев Жапония парламентінің Қазақстанмен достық лигасының төрағасы Тошиаки Эндоны қабылдады
Жарияланған күні:

Мемлекет басшысы Қасым-Жомарт Тоқаев Жапония парламентінің Қазақстанмен достық лигасының төрағасы Тошиаки Эндоны қабылдады. Бұл туралы Ақорда Telegram-дағы ресми арнасында хабарлады.
Кездесуде Қазақстан мен Жапония арасындағы ынтымақтастықты одан әрі тереңдетудің және парламентаралық ықпалдастықты нығайтудың өзекті мәселелері қарастырылды.
Қасым-Жомарт Тоқаев Тошиаки Эндоға ілтипат білдіре отырып, азаматтарымыздың жапон халқына құрметі ерекше екенін айтты.
Мемлекет басшысы екі ел арасындағы сенімді қарым-қатынастың айрықша деңгейде екенін атап өтті. Сондай-ақ Жапония парламентінің Қазақстанмен достық лигасының өзара байланыстарды нығайтуға қосқан үлесін жоғары бағалады.
Қазақ-жапон қатынастары саласында экономикалық бағыт маңызды рөл атқарады. Президент сауда және инвестициялық іс-әрекеттердің мол мүмкіндігіне назар аударып, еліміздің экономикалық ынтымақтастықты нығайтуға мүдделі екенін айтты.
Қасым-Жомарт Тоқаев елімізге 8 миллиард доллар инвестиция құйған Жапония Қазақстан экономикасының ең ірі инвесторларының ондығына кіретініне назар аударды. Сондай-ақ мемлекеттер арасындағы тауар айналымы 2 миллиард долларға жеткенін атап өтіп, бұл көрсеткішті одан әрі арттыру үшін мол әлеует бар екенін жеткізді.
Тошиаки Эндо кездесуге мүмкіндік бергені үшін Қасым-Жомарт Тоқаевқа алғыс айтып, Жапония премьер-министрі Фумио Кисиданың жолдаған хатын табыстады.
Парламенттік достық лигасының төрағасы Жапония парламентінің барлық сала бойынша Қазақстанмен өзара тиімді серіктестікті кеңейтуге дайын екенін растады.
Мақаланың түпнұсқасы: https://kaz.nur.kz/politics/kazakhstan/2027534-toqaev-zaponiya-parlamentinin-qazaqstanmen-dostyq-ligasynyn-toragasy-tosiaki-endony-qabyldady/