Қостанайда ауылшаруашылығы мамандары неге бір жылға жуық жалақы алмаған: әкім жауап берді

Қостанай облысында "Заречное ауыл шаруашылығы тәжірибе станциясының" жұмысшылары бір жылға жуық жалақысыз отырған. Бұл жайтқа Қостанай облысының әкімі Құмар Ақсақалов түсінік берді, деп хабарлайды KAZ.NUR.KZ тілшісі.

Орталық коммуникациялар қызметі ұйымдастырған брифинг барысында портал тілшісі Қостанай облысы әкімінен "Заречное ауыл шаруашылығы тәжірибе станциясының" жалақысын ала алмай отырған жұмысшыларының жағдайын сұрады.

"Өкінішке қарай, осындай жағдайлар бар. Бұл факт. Компанияның бүгінгі күні жалақы бойынша 150 миллион теңге берешегі бар. "Заречное ауыл шаруашылығы тәжірибе станциясының" басшысы жұмыстан шығарылды. Ауыл шаруашылығы министрімен, вице-министрімен келіссөздер жүргізілді. Шешімді сол кісілер қабылдайды", - деп жауап берді Құмар Ақсақалов.

"Әкім он ай бойы жалақысыз отырған тұрғындармен кездесті ме?" деген тілші сауалына өңір басшысы "Заречное ауыл шаруашылығы тәжірибе станциясы" әкімдікке қарамайтынын, жуырда Ауыл шаруашылығы министрлігі өкілі келіп жұмысшылармен кездесу өткізгенін алға тартты.

Айта кетейік, Қостанай облысындағы "Заречное" ауыл шаруашылығы тәжірибе станциясы" ЖШС-нің 200-дей жұмысшысы 10 ай жалақы алмаған. Кейбірінің қарызы үшін газы мен жарығын өшіріп тастады. Аудан әкімдігі де бұл мәселені жоғары жаққа қанша айтқанмен шеше алмаған.

Мәтіннен қате тапсаңыз, бізге жазыңыз