Қырғызстанда астананы ауыстыру ұсынылды

Жогорку Кенеш депутаты Бақытбек Марипов Бішкектегі көлік кептелісі мәселесін шешу үшін Қырғызстан астанасын басқа жерге көшіруді ұсынды. Бұл туралы KAZ.NUR.KZ kaktus.media сайтына сілтеме жасап хабарлайды.

Депутаттың айтуынша, Қырғызстан астанасы Бішкекті "екі басы бар" әкім басқарса да, қаладағы түтін және кептеліс мәселесі шешілмейді.

"Мәселені шешу үшін астананы басқа жерге көшіру керек деп санаймын. Бұны талқылау керек. Ыстықкөл жағасында салынып жатқан Асман қаласының құрылысына 10 млрд доллар инвестиция тартылып жатыр, темір жолды Бішкектің сыртына көшіру үшін 550 млн доллар, ал айналма жол құрылысына жалпы алғанда тағы 1 млрд доллар қажет. Сондықтан астананы көшіруді ұсынып отырмын. Сонда кептеліс те болмас еді", - деді Марипов Жогорку Кенештің бүгінгі отырысында.

Естеріңізге сала кетсек, бұған дейін Иран президенті Масуд Пезешкиан ел астанасын Тегераннан басқа қалаға көшіруді ұсынған еді.

Мәтіннен қате тапсаңыз, бізге жазыңыз