ҚҚС мөлшерлемесін арттыру, тіркеу шегін төмендету: салық кодексінің жобасы мәжіліске енгізілді

2025 жылдың 20 ақпанында Ұлттық экономика министрлігі мәжіліске салық кодексінің жобасына түзетулер пакетін енгізді, деп хабарлайды Ұлттық экономика министрлігінің Telegram-дағы арнасына сілтеме жасаған KAZ.NUR.KZ.

Министрліктің баспасөз қызметінің хабарлауынша, өзгерістер салықтық әкімшілендіруді жетілдіруге бағытталған.

Негізгі түзетулер:

• Қосылған құн салығы бойынша міндетті тіркеу шегін төмендету – 78,6 млн теңгеден 15 млн теңге дейін;
• Қосылған құн салығының мөлшерлемесін арттыру – 12 пайыздан 16 пайызға дейін, бұған қоса бірқатар сала үшін төмендетілген мөлшерлеме 10 пайыз белгіленеді;
• Жеңілдетілген декларация бойынша арнайы салық режимін қолдануды шектеу – тек B2C сегментіне қолжетімді болады.

Еске сала кетейік, 28 қаңтарда премьер-министр Олжас Бектенов қосылған құн салығын көтеруді ұсынды, оның орнына жұмыс берушілер үшін әлеуметтік салық пен зейнетақы жарналарын төмендету ұсынылды.

Сол күні үкіметте өткен брифингте премьер-министрдің орынбасары әрі Ұлттық экономика министрі Серік Жұманғарин ҚҚС көтерілгеннен кейін Қазақстанда азық-түлік пен басқа да тауарлар сөзсіз қымбаттайтынын айтқан еді. Серік Жұманғарин Қазақстанда ҚҚС-ты көтеру жоспары туралы айта келе, жаңа мөлшерлеме әлі анықталмағанын, бірақ 16-20 пайыздық мөлшерлеме аясында болатыны талқыланып жатқанын мәлім етті.

Сондай-ақ Ұлттық банк төрағасының орынбасары Берік Шолпанқұлов сенат кулуарында қосылған құн салығы көтерілгеннен кейін инфляцияны қалай тежеуге болатыны туралы айтты.

Кейін мемлекет басшысы отандық бизнес өкілдерімен кездесіп, қосымша құн салығы мәселесін талқылауға қатысты. Сол кездесуде Қасым-Жомарт Тоқаев үкіметке қосымша құн салығы мәселесін тағы да пысықтауды тапсырды. Президент қосымша құн салығының мөлшерлемесі сараланып белгіленуге тиіс екенін және үкіметтің ұсынған мөлшерлемесі тым жоғары екенін айтты. Сондай-ақ мемлекет басшысы үкіметке бұл мәселені депутаттармен және сарапшылармен егжей-тегжейлі талқылауды тапсырды.

Бұдан соң премьер-министрдің орынбасары - ұлттық экономика министрі Серік Жұманғарин салық заңнамасына жаңа түзетулер, атап айтқанда ҚҚС-тың сараланған мөлшерлемесін ұсынды: 16 пайыз - 10 пайыз - 0 пайыз.

Артынша Ұлттық экономика министрлігінің өкілдері өңірлерде Қаржы министрлігі мемлекеттік кірістер комитеті өкілдерімен бірлесе бизнес-қоғамдастықпен кездесіп, ҚҚС мөлшерлемесін талқылады.

19 ақпанда Ұлттық экономика министрінің орынбасары Азамат Әмрин қосылған құн салығын талқылау аяқталғанын мәлім еткен еді.

"Мемлекет басшысының тапсырмасы бойынша 6 жұмыс тобы бүкіл өңірлерді аралап, бизнеспен, кәсіпкерлермен кездесіп шықты. Сол кездесулерде айтылған ұсыныстарды қазір талдап жатырмыз. Ұсыныстарды парламентке енгіземіз", - деген еді ол.