Сенатта Конституцияның 30 жылдығына орай рақымшылық жасау туралы заң мақұлданды

Сенат Конституцияның 30 жылдығына орай сотталғандардың кейбіріне рақымшылық жасау туралы заңға дауыс берді, деп хабарлайды KAZ.NUR.KZ сенаттың баспасөз қызметіне сілтеме жасап. Алдын ала мәлімет бойынша, рақымшылық 15 мың адамның тағдырын шешеді.

Заң жобасын бір топ депутат Қазақстан Республикасы Конституциясының 30 жылдығына байланысты қылмыстық саясатты ізгілендіру мақсатында әзірлеген.

Рақымшылық сотталғандардың мынадай санаттарына жасалады:

• қылмыстық құқық бұзушылық немесе онша ауыр емес қылмыс жасаған адамдар;
• орташа ауырлықтағы қылмысты залалсыз жасаған немесе оның орнын толық өтеген;
• әлеуметтік осал топтағы адамдар.

Бұл ретте айта кетерлігі, ауыр қылмыстарға, сондай-ақ сыбайлас жемқорлық істеріне, терроризм мен экстремизмге қатысты қылмыстарға рақымшылық жасалмайды.

Сенатта атап өтілгендей, алдын ала болжам бойынша, рақымшылық 15,1 мыңнан астам сотталған адамның тағдырына әсер етеді. Оның 4,1 мыңы қылмыстық жауапкершіліктен және жазадан босатылады.

Сондай-ақ 11 мың сотталушының негізгі жаза мерзімі мен мөлшері қысқартылады.

Мәтіннен қате тапсаңыз, бізге жазыңыз