Тоқаев қазақстандықтарды Ұлттық кітап күнімен құттықтап, арнаулы жарлыққа қол қоятынын айтты

Мемлекет басшысы Қасым-Жомарт Тоқаев қазақстандықтарды Ұлттық кітап күнімен құттықтады, деп хабарлайды KAZ.NUR.KZ Ақордаға сілтеме жасап.

Президент Қасым-Жомарт Тоқаев қазіргі кезеңде баспа ісінде ауқымды өзгерістер болып жатқанын атап өтті.

"Соған қарамастан кітап рухани және адами құндылықтардың қайнар көзі ретінде ешқашан мән-маңызын жоғалтпайды.

Қазір қоғамның кітап оқу мәдениетіне, соның ішінде классикалық көркем шығармаларды немесе бүгінгі заманның өзекті мәселелеріне арналған жарияланымдарды оқуға біртіндеп қайта бет бұрып жатқаны байқалады. Осы оң үрдіс жастар арасында да кеңінен таралып келеді.

Жаппай цифрландыру және Жасанды Интеллектінің үстемдігі арта түскен уақытта оқу мәдениеті ұлт сапасының бірден-бір өлшемі ретінде халқымыздың бітім-болмысына тән айнымас қасиет болып қала беруге тиіс", - дейді президент.

Сондай-ақ мемлекет басшысы алдағы екі апта ішінде оқу мәдениетін кеңінен насихаттау және оқуға құштар, зияткер ұлт қалыптастыру шаралары туралы арнаулы Жарлыққа қол қоятынын айтты.

Мәтіннен қате тапсаңыз, бізге жазыңыз