Тоқаев: Бүгін тәуелсіз Қазақстанның дамуындағы тұтас бір дәуірді қорытындылап отырмыз

Мемлекет басшысы Қасым-Жомарт Тоқаев парламент палаталарының бірлескен отырысында сөз сөйледі, деп хабарлайды Ақордаға сілтеме жасаған KAZ.NUR.KZ.

"Бүгінгі парламенттің қос палатасының бірлескен отырысының тарихи мән-маңызы айрықша деп айтсақ, дұрыс болар. Бұл дүйім халқымыз үшін де айқын нәрсе, ақиқат.

Бүгін біз мемлекетіміздің заң шығарушы органы – парламенттің кезекті сессиясын аяқтап, тәуелсіз Қазақстанның дамуындағы тұтас бір дәуірді қорытындылап отырмыз. Осылайша, тереңнен тамыр тартқан мемлекеттігіміздің жаңа кезеңіне қадам басқалы тұрмыз", - деді президент.

Мемлекет басшысы ертең Қазақстан Республикасының жаңа Конституциясы заңды күшіне енетінін атап өтті.

"Ұлт заңымен қатар, мемлекеттік билік жүйесі де түбегейлі жаңа сипатқа ие болмақ. Қос палаталы парламенттің орнына Құрылтай келеді. Жалпы, бұл өзгеріс Қазақстанда тарихи сабақтастық бар екенін анық көрсетеді", - деді Қасым-Жомарт Тоқаев.

Президент осыдан отыз жылдан астам уақыт бұрын елімізде тұңғыш кәсіби парламент құрылғанын еске салды.

"Мүлде жаңа институционалдық үлгіге көшкен заң шығарушы орган мемлекеттігімізді нығайтуға елеулі үлес қосты, сондай-ақ еліміздің құқықтық негізін қалыптастыру және нарықтық экономиканы орнықтыру ісінде маңызды рөл атқарды.

Қысқаша айтсақ, отыз жылдың ішінде 3,5 мыңға жуық аса қажетті заң қабылданды. Ал әрбір оныншы заңға депутаттар өздері бастамашы болды.

Заң шығару жүйесінің қайнар бастауында бүкіл халқымызға және халықаралық қауымдастыққа танымал саясаткерлеріміз, көрнекті мемлекет қайраткерлері, белгілі қоғам қайраткерлері тұрды. Олардың жемісті еңбегі парламент тарихында өшпес із қалдырды. Қажырлы қызмет халқымыздың жадында мәңгі сақталып қаларына күмән жоқ", - деді мемлекет басшысы.

Президенттің айтуынша, парламент әрдайым уақыт талабына тез бейімделіп, қоғам сұранысына лайықты жауап бере алатын жасампаз құрылым болды.

"Парламент мемлекетіміздің басты өкілді органы қоғамның түрлі саласындағы кәсіби мамандарды бір мақсатқа тоғыстырды. Елімізде саяси және заңнамалық тұрғыдан сапасы жоғары парламенттік мәдениет қалыптасты.

Бұл – Қазақстанды дамыған ел ретінде айқындайтын ең маңызды көрсеткіштің бірі.

Түптеп келгенде, парламенттің әрбір шақырылымы Қазақстанның алға қарай нық сеніммен қадам басуына зор серпін берді, басқаша айтсақ, ұлтымыздың эволюциялық өрлеу жолының жарқын үлгісіне айналды", - деді Қасым-Жомарт Тоқаев.

Естеріңізге сала кетейік, бүгін парламент палаталарының бірлескен соңғы отырысы өтті. Тамыз айында бір палаталы жаңа парламент – Құрылтай сайлауы өтіп, ол 1 қыркүйекте өз жұмысын бастайды.

Мәтіннен қате тапсаңыз, бізге жазыңыз