Тоқаев келесі президент сайлауына қатыса ма: мемлекет басшысының жауабы

Қазақстан президенті Қасым-Жомарт Тоқаев келесі президент сайлауына қатысуы немесе қатыспауы туралы сұраққа жауап берді, деп хабарлайды Ақордаға сілтеме жасаған KAZ.NUR.KZ.

Құрылтай сайлауында дауыс бергеннен кейін мемлекет басшысы БАҚ өкілдеріне брифинг өткізді. Журналистердің бірі Қасым-Жомарт Тоқаевқа келесі президент сайлауына қатысты сұрақ қойды.

"Қасым-Жомарт Кемелұлы, жуырда Конституциялық сот жариялаған түсіндірмеге сәйкес, сіздің мемлекет басшысы ретінде президент лауазымына қайта сайлануға құқығыңыз бар екен. Бұл жаңалық қоғамды елең еткізді. Сіз өз құқыңызды пайдаланып, 2029 жылғы президент сайлауына түсуді жоспарлап отырсыз ба? Президент сайлауы 2029 жылы өте ме, әлде кезектен тыс сайлау болуы мүмкін бе?" - деп сұрады журналист.

Тілшінің сұрағына жауа берген президент Конституциялық сот осындай шешім қабылдағанын атап өтті.

"Әлбетте, заң жүзінде менің қайта сайлануға құқығым бар. Бірақ алдағы уақытта сайлау өткізуге және оған қатысатыным немесе қатыспайтыным туралы сөз қозғауға әлі ерте. Біз еліміздің алдында тұрған ауқымды міндеттерді еңсеруіміз керек. Тұтас Қазақстанды үлкен құрылыс алаңына айналдырып, ең алдымен, азаматтарға арналған әлеуметтік нысандар салуымыз қажет. Бұл мақсатқа Ұлттық қордың қаржысын пайдалануға дайынмын.

Халықтың игілігіне жарата алмасақ, қаражатты шетелдерде құнды қағаз ретінде ұстап отырудың қажеті қанша? Қаржыны жай ғана ұстап отыруға қарсымын. Қаражат халқымыздың, азаматтарымыздың игілігіне қызмет етуі керек.

Әрине, әлемдегі жағдайға баса назар аударуымыз, жан-жақты талдауымыз қажет. Өздеріңіз білесіздер, геосаяси ахуал күрделі. Бұралаң жолмен жүргенімізге қарамастан, ел ішінде бейбітшілікті сақтап, дамуға қарай бет алып келеміз. Экономикалық өсім анық байқалады. Мұны негізгі халықаралық қаржы институттарының бағасы да растады. Алдағы уақытта тағы жолығармыз. Бәлкім, келесі жылы... Сол кезде сізге нақты жауап беремін", - деді Қасым-Жомарт Тоқаев.

Мәтіннен қате тапсаңыз,бізге жазыңыз