Тоқаев 16 жасқа толмаған балаларға желіде тіркелуге тыйым салу туралы пікірін айтты

Тамыз конференциясында сөз сөйлеген мемлекет басшысы Қасым-Жомарт Тоқаев өскелең ұрпақтың психологиялық саулығын сақтау туралы ойын бөлісті, деп хабарлайды Ақорда.

Президенттің айтуынша, әлеуметтік желілер, цифрлық платформалар, жасанды интеллект пен агрессивті маркетинг балалар дүниетанымына отбасы мен мектептен кем әсер етпейді.

Қасым-Жомарт Тоқаев ұлттық қауіпсіздікке және елдің орнықты дамуына өскелең ұрпақтың психологиялық саулығы мен эмоциялық тұрақтылығы, адамгершілік тәрбиесі ықпал ететін маңызды факторға айналғанын сөз етті.

"Қазіргі жағдай 2018 жылы қабылдаған "Балаларды денсаулығы мен дамуына зардабын тигізетін ақпараттан қорғау туралы" Заңды қайта қарауды және елеулі өзгерістер енгізуді талап етеді.

Үкімет 16 жасқа толмаған пайдаланушыларға әлеуметтік желіде тіркелуге тыйым салатын заң жобасын әзірледі (биыл маусым айында парламент қарауына ұсынылды). Құрылтайдың бірінші сессиясының ашылуында депутаттарға осы мәселені қарастыруды ұсынамын", - деді президент.

Оның айтуынша, көптеген озық елдер осы іспеттес шаралар қабылдады.

"Бізге де балалардың психологиялық жай-күйіне төнген қауіптің салдарымен күресуді доғарып, алдын алатын кез келді деп ойлаймын. Әйтпесе бұл қоғамның тұрақтылығына кері әсерін тигізеді.

Үкімет балаларды қорғау мақсатында мазмұнды (контентті) сүзгіден өткізу шараларын қабылдағаны жөн. Белгілі бір, мейлінше объективті себептерге байланысты жауапкершілікті ата-аналарға ғана артып қоя алмаймыз.

Сондықтан балаларға арналған міндетті SIM-карталарды енгізу тәжірибесін жаппай таратуды тапсырамын. Бұл олардың ақпараттық иммунитетін қамтамасыз ете алады", - деді ол.

Мәтіннен қате тапсаңыз,бізге жазыңыз