Аға журналист

Тоқаев жазушы Валерий Михайловты І дәрежелі "Барыс" орденімен марапаттау туралы жарлыққа қол қойды

Жарияланған күні:Бүгін, 07 қыркүйек 2026, 09:45

Қасым-Жомарт Тоқаев қол қоюда — Қасым-Жомарт Тоқаев. Фото: Ақорда

Мемлекет басшысы жазушы Валерий Михайловты І дәрежелі "Барыс" орденімен марапаттау туралы Жарлыққа қол қойды, деп хабарлайды Ақорда.

"Президент Қасым-Жомарт Тоқаев отандық әдебиеттің дамуына қосқан айрықша үлесі үшін жазушы Валерий Михайловты І дәрежелі "Барыс" орденімен марапаттау туралы Жарлыққа қол қойды", - делінген Ақорда хабарламасында.

Сондай-ақ президент Қазақстанның халық жазушысы Валерий Михайловқа құттықтау жеделхатын жолдады. Ол жеделхатта Валерий Михайловты 80 жылдық мерейтойымен құттықтады.

"Табиғи талантыңыз бен еңбекқорлығыңыздың арқасында шығармашылық жолыңызда ерен табысқа қол жеткіздіңіз. Ұзақ жылдар бойы еліміздің беделді басылымдарында жемісті еңбек етіп, "Казахстанская правда" газеті мен "Простор" журналын басқардыңыз. Адамгершілігі мол әрі өмірлік ұстанымдарынан айнымаған тұлға ретінде қаламгерлер арасында және қоғамда үлкен құрметке бөлендіңіз", - деп жазылған жеделхатта.

Президент Қасым-Жомарт Тоқаев Валерий Михайловтың бірнеше буын оқырман қызыға оқитын шығармалары төл әдеби қазынамыздың бір бөлшегі ретінде лайықты бағаға ие болғанына назар аударды.

"Әдебиет" порталының мәліметінше, Валерий Михайлов 1946 жылы 7 қыркүйекте Қарағанды қаласында туған.

Қазақ политехникалық институтының геофизика факультетін бітірген. Республикалық газеттерде жұмыс істеген. 1997 жылдан "Казахстанская правда" газетінің бас редакторы болып қызмет еткен. 2003 жылдан бері "Простор" журналында бас редактор. Қазақстан Жазушылар одағы басқармасының хатшысы болған.

Д.Досжановтың, Б.Мұқаевтың, т.б. қазақ жазушыларының шығармаларын орыс тіліне аударған.

"Хроника великого джута" деректі повесі (1990, 1996), бірқатар очерктер жинағы, "Прямая речь" (1983), "Весть" (1994), "Немерцающий свет" (1996), "Ограда" (1999), "Молитвенный дым" (2003), "Колыбельная из-под небес" , "Молчун-трава", "Золотая дремота" (2005), "Пыльца", "Годовая свеча" (2006), "Русский хаос" (2007), "Паслён", "Тысячелетие другое", "Угол сердца" (2008) өлеңдер жинағы жарық көрген. КСРО Жазушылар одағының мүшесі (1987). Поэзия академиясының корреспондент-мүшесі (Мәскеу).

Халықаралық «Алаш» әдеби сыйлығының лауреаты. "Парасат" орденімен (1996), екі медальмен марапатталған.

Мәтіннен қате тапсаңыз,бізге жазыңыз