Шымкентте білім беру ресурстарын тиімді басқару мәселелері талқыланды

Шымкент қаласында "Балаларға қосымша білім беруге арналған бірыңғай мемлекеттік тапсырыс: шектеулі бюджет жағдайында білім беру ресурстарын басқару" тақырыбындағы өңіраралық тәжірибелік семинар-кеңестің алғашқы күні өтті. Іс-шара Қазақстан Республикасы Оқуағарту министрлігінің бастамасымен қосымша білім беруге арналған бірыңғай мемлекеттік тапсырыс пилоттық жобасының тәжірибесін өңірлерге тарату аясында ұйымдастырылды, деп хабарлайды Шымкент әкімдігі.

Семинарға орталық мемлекеттік органдардың, "Қазақтелеком" АҚ мен "Қаржы орталығы" АҚ-ның өкілдері, еліміздің 11 өңірінен әкімдердің орынбасарлары, білім беру, экономика, цифрландыру, спорт және мәдениет салаларының басшылары мен мамандары қатысты.

Кездесуде шектеулі бюджет жағдайында білім берудің сапасы мен қолжетімділігін сақтай отырып, мемлекеттік ресурстарды ұтымды пайдалану жолдары талқыланды.

Шымкент қаласы әкімінің орынбасары Сәрсен Құранбек білім беру жүйесінің ішкі мүмкіндіктерін тиімді пайдалану, жоспарлау мен қаржылық тәртіпті жетілдіру, қолданыстағы инфрақұрылымның әлеуетін арттыру бойынша қала тәжірибесін таныстырды.

Негізгі назар бюджет қаражатын пайдаланудағы ашықтық пен басқарушылық шешімдердің деректерге негізделуіне аударылды. Шымкентте іске асырылған бірыңғай мемлекеттік тапсырыстың пилоттық жобасы нақты мысал ретінде қаралды. Дербестендірілген есепке алу және цифрлық тексеру арқылы балалар туралы қайталанатын жазбаларды жою, қызметтің көрсетілгенін растау және қаржыландыруды нақты қызмет алушыға байланыстыру тетіктері енгізілді.

Сондай-ақ мемлекеттік мектептердің бос қуаттарын пайдаланып, балалардың қосымша біліммен қамтылуын кеңейту жолдары талқыланды.

Қаланың тәжірибесі қолда бар ресурстарды ұтымды пайдалану балаларға қолжетімді білім беру мүмкіндіктерін кеңейтуге жол ашатынын көрсетті.

Айта кетейік, 16 қазанда семинар №149 жалпы білім беретін мектепте (Шымкент қаласы, Нұршуақ шағынауданы, 1229) жалғасады. Өңірлік мамандарға арналған тәжірибелік сессияда бірыңғай мемлекеттік тапсырыстың нормативтік, ұйымдастырушылық, қаржылық және бақылау тетіктері қарастырылады.

Мәтіннен қате тапсаңыз, бізге жазыңыз