Сәтқалиев Тоқаевқа АЭС құрылысы мен Қазақстанда ядролық қауіпсіздік аймағын құру туралы баяндады

Мемлекет басшысы Қасым-Жомарт Тоқаев Атом энергиясы жөніндегі агенттіктің төрағасы Алмасадам Сәтқалиевті қабылдады, деп хабарлайды Ақордаға сілтеме жасаған KAZ.NUR.KZ.

Президенттің баспасөз қызметінің мәліметінше, Қасым-Жомарт Тоқаевқа агенттіктің 2026 жылы атқарған жұмысының негізгі нәтижелері туралы есебі таныстырылған.

Сонымен қатар атом өнеркәсібі мен энергетика жөнінде мәлімет берілген.

"Атап айтқанда, АЭС құрылысы, атом ғылымы мен инновацияларды дамыту, маман даярлау және саладағы жобалардың отандық үлесін арттыру мәселелері көтерілді.

Семей ядролық қауіпсіздік аймағын құру, радиоактивті қалдықтарды басқару жүйесін жетілдіру, ядролық және радиациялық қауіпсіздік саласындағы нормативтік-құқықтық базаны нығайту мәселелеріне ерекше назар аударылды", - делінген хабарламада.

Кездесу соңында президент ұлттық атом энергетикасын ілгерілету мәселелерін айрықша бақылауда ұстауды, сондай-ақ Атом саласының даму стратегиясы аясында айқындалған міндеттерді жүзеге асыру жөнінде уақтылы шаралар қабылдауды тапсырған.

Мәтіннен қате тапсаңыз, бізге жазыңыз