Түркияның сыртқы істер министрлігі "қазақ бауырларға" алғыс айтты

Түркияның сыртқы істер министрлігі орман өртін ауыздықтауға көмек жібергені үшін Қазақстанға алғыс айтты. Ресми хабарлама түрік СІМ Twitter парақшасында жарияланды.

"Қазақ бауырларымызға тілектестік пен қолдау үшін алғысымызды білдіреміз", - делінген хабарламада.

Хабарламаға Қазақстан Сыртқы істер министрлігінің президент Қасым-Жомарт Тоқаевтың тапсырмасы бойынша Төтенше жағдайлар министрлігі суағар құрылғылары бар "Қазавиақұтқару" АҚ-ның Ми-8 АМТ 2 тікұшағын және құрамында 16 құтқарушы бар жедел тобын орман өрттерін сөндіруге көмек көрсету үшін Түркия Республикасына жібергені туралы жазба бекітілген.

Еске сала кетсек, шілде айының соңында Түркияда дала өрті болып, Анталья, Бодрум, Мармарис сынды курорттық аймақтарда орман өртенген еді. Мыңдаған адам аталған аудандардан эвакуацияланды. Тұрғындар баспанасы мен мал-мүлкінен айырылған.

Кейінірек, БАҚ беттерінде орман өртін террористік ұйым өз мойнына алғаны хабарланды.

Мәтіннен қате тапсаңыз, бізге жазыңыз