Иманғали Тасмағамбетов ҰҚШҰ-ның бас хатшысы қызметінен кетеді
Опубликовано:
Читать на русском
Ұжымдық қауіпсіздік туралы шарт ұйымы (ҰҚШҰ) 27 қарашада ұйымның жаңа бас хатшысының кандидатурасы қарастырылатынын мәлімдеді. Қазір бұл лауазымды Иманғали Тасмағамбетов иеленіп отыр, деп хабарлайды KAZ.NUR.KZ.
ҰҚШҰ-ның мәліметінше, 27 қарашада Бішкекте Ұжымдық қауіпсіздік кеңесінің отырысы өтеді.
Отырысқа қатысушылар бірлескен жұмыс бойынша өзекті мәселелерді, соның ішінде есірткінің заңсыз айналымы мен заңсыз көші-қонға қарсы күрестегі ынтымақтастықты нығайтуды талқылайды.
"ҰҚШҰ-ның ҰҚК сессиясында, атап айтқанда, мүше мемлекеттердің қауіпсіздікке қатысты өзекті мәселелер жөніндегі ортақ көзқарасы көрсетілетін декларацияны қабылдау және алдағы үш жылдық кезеңге (2026-2029 жылдар) ҰҚШҰ-ның бас хатшысы лауазымына кандидатураны қарастыру жоспарланып отыр", - делінген хабарламада.
Естеріңізге сала кетейік, Иманғали Тасмағамбетов ҰҚШҰ-ның бас хатшысы лауазымын 2023 жылғы қаңтардан бері атқарып келеді.
Ол бұл қызметте Беларусь елінің өкілі Станислав Засьты алмастырған еді.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/politics/universe/2312458-imangali-tasmagambetov-uqshu-bas-hatshysy-qyzmetinen-ketedi/