Оңтүстік Корея президенті Тоқаев пен ҰҚК-ға алаяқтарды ұстауда көрсеткен көмегі үшін алғыс айтты

Оңтүстік Корея Президенті Ли Чже Мен Қазақстан президенті Қасым-Жомарт Тоқаев пен Ұлттық қауіпсіздік комитетіне алаяқтарды ұстауға көмектескені үшін алғыс білдірді, деп хабарлайды KAZ.NUR.KZ.

Оңтүстік Корея президенті Ли Чже Мен X желісінде жазба жариялады. Ол онда Қазақстан президенті Қасым-Жомарт Тоқаев пен ҰҚК-ге алаяқтарды ұстауға көрсеткен көмегі үшін алғысын жеткізді.

"Камбоджа мен Вьетнам арқылы Қазақстанға жасырын кіріп, біздің азаматтарымызға қатысты телефон алаяқтығымен айналысқан Оңтүстік Кореяның ұйымдасқан қылмыстық тобының мүшелері ұсталғаннан кейін екі апта өткен соң елге қайтарылды. Қазіргі уақытта оларға қатысты тергеу жүргізілуде.

Ұстаудан бастап депортациялауға дейінгі жедел жұмыс Қазақстан Республикасының президенті Қасым-Жомарт Тоқаев пен Қазақстан Республикасы Ұлттық қауіпсіздік комитетінің белсенді қолдауы мен ынтымақтастығының арқасында мүмкін болды", - деп жазды Ли Чже Мен.

Ол Қазақстан президентімен жақын арада жеке кездесуге үмітті екенін білдірді.

"Біз Қасым-Жомарт Тоқаев мырзаға және тиісті тараптарға шынайы алғысымызды білдіреміз. Келесі айда өтетін "Корея Республикасы – Орталық Азия" саммитінде жеке кездесіп, алғысымызды білдіруге мүмкіндік болады деп үміттенеміз.

Корея Республикасы азаматтарының қауіпсіздігі мен бейбіт өміріне қауіп төндіретін қылмыстар үшін ешқандай жеңілдік болмайды. Олар қай жерде жасырынса да, біз оларды тауып, жауапкершілікке тартамыз", - деп жазды Ли Чже Мен.

Мәтіннен қате тапсаңыз,бізге жазыңыз