Пашинян Тоқаевты бір палаталы Құрылтай сайлауының табысты өтуімен құттықтады

Армения премьер-министрі Никол Пашинян Қасым-Жомарт Тоқаевты бір палаталы Құрылтай сайлауының табысты өтуімен құттықтап, аталған оқиғаның Қазақстан үшін тарихи маңызы зор екенін айтты, деп хабарлайды Ақорда.

Ақорданың баспасөз қызметінің хабарлауынша, мемлекет басшысы Қасым-Жомарт Тоқаев Армения премьер-министрі Никол Пашинянмен телефон арқылы сөйлесті.

Никол Пашинян ел президентін бір палаталы Құрылтай сайлауының табысты өтуімен құттықтаған.

"Президент премьер-министрге жылы лебізі және халықаралық байқаушылар миссиясы құрамында Армения өкілдерінің сайлауға белсене қатысқаны үшін ризашылығын білдірді", - делінген хабарламада.

Әңгімелесу барысында бірлескен сауда-экономикалық және инвестициялық жобаларды жүзеге асыруға баса назар аударылып, екіжақты ынтымақтастықтың қазіргі жай-күйі мен даму перспективасы талқыланды.

Мәтіннен қате тапсаңыз,бізге жазыңыз