Еуропа елдерінің бірі Астанада елшілігін ашуы мүмкін

Қазақстанның Словениядағы елшісі Алтай Әбибуллаев Словения Республикасының Сыртқы және еуропалық істер министрі Тоне Кайзермен кездесті деп хабарлайды ҚР СІМ-ға сілтеме жасаған KAZ.NUR.KZ.

Ведомствоның баспасөз қызметінің мәліметінше, Әбибуллаев пен Кайзер кең ауқымды мәселелерді, сондай-ақ Қазақстанның жаңа Конституциясын және парламенттік сайлаудың қорытындыларын талқылаған.

"Словенияның сыртқы саяси ведомствосының басшысы Қазақстанды Словенияның Орталық Азиядағы маңызды серіктесі ретінде қарастыратынын растады және жаңа үкіметтің сауда-экономикалық ынтымақтастықты жандандыруға дайын екенін білдірді.

Дипломатиялық қатынастардың орнағанына 35 жыл толуына орай тараптар алдағы кезеңде Словенияның Астанада толыққанды елшілігін ашуға мүдделілік танытты. Бұл екіжақты қатынастарды одан әрі дамытуға қосымша серпін берері атап өтілді", - делінген хабарламада.

Кездесу барысында тараптар өзара сауда көлемінің оң динамикасын атап өткен. 2025 жылы оның көлемі 220 млн АҚШ долларынан асқан. Сонымен қатар фармацевтика және жоғары технологиялар салаларындағы ынтымақтастыққа да ерекше назар аударылған.

Словения делегациясы мен елдің жетекші IT-компаниялары 1-3 қазанда Астанада өтетін AI & Digital Bridge Forum халықаралық форумына қатысуға шақырылған.

Кездесуде Қазақстанның Халықаралық су ұйымын құру жөніндегі бастамасы және КҚК төңірегіндегі ахуал да талқыланған. Словения тарапы Қазақстанның Еуропалық одақтың энергетикалық қауіпсіздігін қамтамасыз етудегі маңызды рөлін атап өтіп, ЕО деңгейіндегі диалогты дамытуға қолдау көрсетуге дайын екенін білдірген.

Кездесу қорытындысы бойынша тараптар екіжақты ынтымақтастықтың барлық спектрі және халықаралық күн тәртібі бойынша тығыз үйлестіруді жалғастыруға дайын екендерін растаған.

Мәтіннен қате тапсаңыз,бізге жазыңыз